தாடி வச்ச பிரபஞ்சம் - கேசட்டுக் கடை கவிதை வரிசை-3

இப்போதான்

ஒரு இயற்பியல் பேராசிரியர்

என்னைக் கூப்பிட்டார்

"நடைமுறையில்

சாத்தியம் இல்லன்னாலும்

கோட்பாட்டளவுல

நீங்க எடுத்தது அழகான முடிவு

எத்தனையோ கோள்கள் நட்சத்திரங்கள்

பிரபஞ்சங்கள்

ஏன் அணுக்கள் கூட

பயன்

பயனின்மை பத்தியெல்லாம்

கவலைப்படாம

சுத்திக்கிட்டு இருக்கு

அப்படி ஒன்னா

உங்க கேசட்டுக் கடை

இருந்துட்டுப் போகட்டுமே"ன்னு

சொன்னாரு

பாருங்க

நான் பறக்க ஆரம்பிச்சுட்டேன்

"அப்பன்னா

நான் ஒரு பிரபஞ்சத்துக்குப்

பொறப்பு கொடுத்திட்டனா

அப்பன்னா

உங்க பாணியில

அதுக்கு ஒரு பேரும்

வச்சிடுங்க சார்"னு

கேட்டதுக்கு

"உங்களுக்கு டி.ஆர். புடிக்கும்னு

எனக்குத் தெரியும்

அதனால டி.ஆர்.55னு வச்சிடுங்க"ன்னாரு

பாருங்க

ஆகா இன்னைலருந்து

நான் தாடி வச்ச

பிரபஞ்சத்துக்கு

சொந்தக்காரன்

-ஆசை 

கடைசியா கேசட்டுக் கடை வைக்கிறவன் - கேசட்டுக்கடை கவிதை வரிசை:2

நான் கேசட்டுக் கடை

வைக்கப்போறேன்னதும்

சாடா பேரும்

வளைச்சுக்கிட்டாய்ங்க

வீட்டுல ஒரே கரைச்சல்

“ஏன்டா இந்தத் தேவையில்லாத

வேலை

யாருடா இப்போ கேசட்டுல்லாம்

ரிலீஸ் பண்ணுறாங்க

யாருடா இப்போ

டேப் ரெக்கார்டெர்லாம்

வச்சிருக்காங்க

சிடி போயே பத்து வருஷம் ஆச்சு

யூடியூபு ஸ்பாட்டிபைன்னு வந்தாச்சு

உனக்கென்ன கிறுக்காடா புடிச்சுருக்குன்னு”

விடாம கேள்வி கேக்குறானுங்க நண்பனுங்கள்லாம்

ஒரே போனு மேல போனு

இதுவரைக்கும் எனக்கு லைக் போடாதவங்கள்லாம்கூட

இன்பாக்ஸ்ல அக்கறையா கேக்குறாங்க

வாட்சப் மூலமா கேக்குறாங்க

எல்லாரும் கேக்குறது சொல்லுறது

எல்லாம் எனக்குப் புரியுது

ஆனா

உலகத்துல ஒருத்தன்

கேசட்டுக் கடை வைக்கணும்னு

ஆசைப்படுறது அவ்வளவு பெரிய குத்தமான்னு

நான் கேக்குறது மட்டும்

யாருக்கும் புரியலை

மொதல்ல நிலாவுக்குப் போனவய்ங்க

மொதல்ல அணுகுண்ட கண்டுபுடிச்சவய்ங்க

மொதல்ல ரேடியோவை கண்டுபுடிச்சவய்ங்க

மொதல்ல ஏரோப்பிளேன்ல பறந்தவய்ங்க

அவ்வளவு ஏன்

மொதல்ல கேசட்டுக் கடை வைச்சவய்ங்களெல்லாம்

கொண்டாடுற இந்த உலகம்

கடைசியா கேசட்டுக் கடை

வைக்க ஆசப்படுறவன மட்டும்

கிறுக்கனாக்கிக்

கீழ ஒக்கார வைச்சிடுது

காலத்தத் தாண்டிக் கனவு கண்டவனையும்

சரி

காலங்கடந்து கனவு காணுறவனயும்

சரி

இந்த உலகம் வாழவச்சதா

சரித்திரமே கெடையாது

கடைசியெல்லாம் முடிஞ்சி போன பிறகும்

கட்டக்கடைசியா ஒரு கடைசியைக்

கொண்டுவர்ற நெனைக்கிறான் பாரு ஒருத்தன்

அதாவது நானு

நியாயமா பாத்தா

என்னெல்லாம்

இந்த உலகமே

தலைமேலே தூக்கிவச்சிக் கொண்டாடனும்

இத்தனைக்கும்

நான் சாதனைக்காக இதை

செய்யணும்னு

நெனைக்கல

எனக்கு கேசட்டுக் கடை வைக்கணும்னு

சின்ன வயசுலேருந்து அவ்வளவு ஆசை

அதுக்குள்ள கேசட்டு டேப்ரெக்கார்டர்லாம்

காணாம போச்சுன்னா

நான் என்ன பண்ணுவேன்

என் ஆசை இன்னும் அப்படியேத்தானே இருக்கு 

-ஆசை

செண்பகா தியேட்டரில் கடைசிக் காட்சி

ஆமாம்

சொந்த கிராமத்தில்

நான் ஆடியோ கேசட் கடை

வைக்கப்போறேன்

உங்களுக்குப் பிடிச்ச பாட்டையும்

பதிவுசெஞ்சு தருவேன்

முடிஞ்சா பக்கத்துலேயே

ஒரு சினிமா கொட்டகை

கட்டுவேன்

மல்ட்டிபிளெக்ஸ் இல்லை

ஒரு திரைதான்

அதற்கு செண்பகா தியேட்டருன்னு

பேர் வைப்பேன்

அதற்கு டிக்கெட் எடுக்க

உள்ளே குகை மாதிரி

வளைஞ்சு வளைஞ்சு

போவணும்

ஆறு மணி ஆட்டமும்

பத்து மணி ஆட்டமும்தான்

வருசத்துக்கு ஒருதரமாவது

ஜெகன்மோகினி

ஒரு தலை ராகம்

வஞ்சிக்கோட்டை வாலிபன்

உதயகீதம்

வைஜெயந்தி ஐபிஎஸ்

படமெல்லாம் போடுவேன்

வாடகை சைக்கிள் கடையும்

தொடங்கலாம்னு யோசனை

சின்னப் பசங்களுக்கெல்லாம்

சின்ன வண்டி நெறையா வாங்கணும்

ஒரு மணி நேரத்துக்கு பத்துக் காசு

வாங்குவேன்

அஞ்சு பத்து ரூபாயெல்லாம்

கொண்டுவராதீங்க

சில்லறை இருக்காது

எங்க தெரு செட்டியார் கடை

தூந்துபோய் இருபது வருஷம்

ஆகுது

அவரு செட்டியாரு இல்லை

கடை வச்சதால செட்டியாரா ஆனவரு

அங்க மறுபடியும்

கீத்து சார்ப்பு வைச்சு

அதே கடைய எடுத்து நடத்தப் போறேன்

போர்டு ஏதும் வைக்க மாட்டேன்

ஆனா நானும் செட்டியார் ஆவேன்

என் கடையும் செட்டியார் கடை ஆகும்

குண்டுகுண்டா தேன்முட்டாயி

சூடகல்ல முட்டாயி

தவுல் வித்துவான் மாதிரி விரல்ல மாட்டிக்கிற

ஆட்டுக்குடலு எல்லாம் வாங்கிவைப்பேன்

யாரும் வரலைன்னாலும்

பரவாயில்லை

நான் மட்டுமாவது

என் செட்டியார் கடையில தேன்முட்டாயி

ஆட்டுக்குடலு வாங்கிக்கிட்டு

என் சைக்கிள் கடையில

சின்ன வண்டி வாடகை எடுத்துக்கிட்டு

என் சினிமா கொட்டகைக்கு

ரெண்டாம் ஆட்டம் படம் பாக்கப் போவேன்

‘வாசமில்லா மலரிது

வசந்தத்தைத் தேடுது’

பாட்டு முடிஞ்சோன

ஒன்ஸ்மோர் கேப்பேன்

பாத்துக்கிட்டே

கொண்டுவந்த தின்பண்டத்தெல்லாம்

தின்னு முடிப்பேன்

படம்முடிஞ்சி

பாதி ராத்திரிக்கு

வீட்டுக்குத் திரும்பும்போதும்

எனக்காகத் திறந்துவைச்சிருக்க

கேசட்டுக் கடையிலயும்

‘வாசமில்லா மலரிது’

பாட்டை போடச் சொல்லிவிட்டு

25 வருஷத்துக்கு முன்னாடி

முளைக்க ஆரம்பிச்ச

தாடிய இங்கேருந்தே

சொறிஞ்சிவிட்டுப்பேன்

கேசட்டுக்கடை

சினிமா கொட்டகை

சைக்கிள் கடை

செட்டியார் கடை

இதையெல்லாம் வைக்க

லட்சம் லட்சமா தேவையில்ல

நெறைய அஞ்சு காசும்

பத்துக் காசும் இருந்தா போதும்

கூடவே

இந்த உலகத்துலேயே

கடைசிப் பத்துக் காசுக்கு

முட்டாய் வாங்குன குழந்தை

கெடைச்சா போதும்

-ஆசை

போலிச்செய்திகளின் போலிக்கவிதைகளின் போலிக்காலத்தின் காலம்

இன்னார் இறந்துபோய்விட்டார் என்று
நாம் நம்பும்
இன்னார் கூறியதும்
உடனே அஞ்சலி செலுத்திவிடுகிறோம்
பின்னே இன்னார் இறக்கவில்லை
அது போலிச் செய்தி என்று
நாம் நம்பும் இன்னார்
கூறியதும்
இன்னார் இறக்கவில்லை
என்று உடனே

அஞ்சலியைத் திரும்பப் பெற்றுவிடுகிறோம்
இறக்க மறந்த இன்னார் மேலோ
அவர் இருப்பதை மறந்த இன்னார் மேலோ
அவர் மீது நம்பிக்கை வைத்த நம் மீதோ
பிழையேதும் இல்லை

ஏனெனில்
போலிச்செய்திகள்
போலிக்கவிதைகள்
எல்லாம் உண்மையாய் மாறும்
தருணம் ஒன்று கண்டிப்பாய் வரும்
நின்றுபோன வீட்டின் சுவர்க் கடிகாரம்
இரண்டு முறை சரியாகக் காலத்தைக் காட்டுவதைப்போல

அது என்ன இரண்டு முறை என்று
கேள்வி எழலாம்

முதல் முறை என்பது

இன்னார் பிறந்த நேரம்
இரண்டாம் முறை என்பது

இன்னார் இறக்கும் நேரம்
இடையில் நாம்
போலிக்காலத்தால்
நிரப்பிக்கொள்ள வேண்டியதுதான்
     -ஆசை

காந்தி பிறந்த நாளில் ஒரு சிறப்பு அறிவிப்பு!

 

‘என்றும் காந்தி’ உள்ளிட்ட எனது நூல்களை சிறப்பு விலையில் வாங்கிக்கொள்ளலாம் என்ற திட்டத்தை காந்தி பிறந்த நாளான இன்று அறிவிப்பதில் மகிழ்ச்சி கொள்கிறேன். இந்தத் திட்டத்தின்படி ‘கொண்டலாத்தி’, ‘அண்டங்காளி’, ‘குவாண்டம் செல்ஃபி’ ஆகிய கவிதை நூல்களையும் ‘இந்தப் பிரபஞ்சமே பேபல் நூலகம்தான்’ என்ற இலக்கிய விமர்சன நூலையும் பாதி விலையில் பெற்றுக்கொள்ளலாம்.

‘என்றும் காந்தி’, 'பறவைகள் அறிமுகக் கையேடு’, ஒமர் கய்யாமின் ‘ருபாயியத்’, பௌத்தத் துறவி திக் நியட் ஹானின் ‘அமைதி என்பது நாமே’ ஆகிய நூல்களை 35 சதவீதத் தள்ளுபடியில் பெற்றுக்கொள்ளலாம். விவரங்கள் மேலே உள்ள படத்தில். இந்தத் திட்டம் என் அப்பா நினைவு நாளான அக்டோபர் 11 வரை மட்டுமே. நண்பர்கள் இந்தப் பதிவைப் பகிர்ந்துகொள்ளும்படி கேட்டுக்கொள்கிறேன். மேலும் தகவல்களுக்கு வாட்ஸப் எண்: 7401329355

(இந்த நூல்களின் பதிப்பாளர்கள்: க்ரியா, டிஸ்கவரி புக் பேலஸ், இந்து தமிழ் திசை)

பின்குறிப்பு: இந்தப் புத்தகங்களைப் படிக்க விரும்பும் ஆனால் பணம் கொடுத்து வாங்குவதற்கு இயலாத நிலையில் உள்ள அன்பர்கள் கூரியர் செலவுக்கான பணத்தை மட்டும் அனுப்பி இந்த நூல்களைப் பெற்றுக்கொள்ளலாம்.

இரண்டு ராமராஜ்யங்கள்

 

இரண்டு ராமராஜ்யங்கள்
உள்ளன

ஒன்று

சீதையின் கற்பைத் 

தலைநகராகக் கொண்டது

இன்னொன்று 

சீதையின் துயரைத்

தலைநகராகக் கொண்டது

ஒன்றில் 

சீதைக்கென்று

எப்போதும் அக்னி

எரிந்துகொண்டிருக்கும்

இன்னொன்றில்

சீதைக்காக ராமனே

எப்போதும் அக்னியில் இறங்குவான்

ஒன்றில்

ஒரே ஒரு ராமன்தான்

மீதமுள்ள எல்லோரும்

அனுமன்கள்

நிமிடந்தோறும்

நெஞ்சைப் பிளந்து

அதன் உள்ளே சீதையற்ற ராமன்

படத்தைக் காட்ட வேண்டியவர்கள்

காட்ட மறுப்போரெல்லாம்

வாலிகள் ராவணன்கள்

கும்பகர்ணன்கள் தாடகைகள்

சூர்ப்பநகைகள்

வதம் செய்ய வேண்டியவர்கள்

இன்னொன்றில்

எல்லோருமே ராமர்கள்

அவர்களாகவே தம் நெஞ்சைப் பிளந்து காட்ட

அதில் அனுமன்கள் சீதைகள் 

வாலிகள் இராவணன்கள்

கும்பகர்ணன்கள் தாடகைகள்

சூர்ப்பநகைகள்

தெரிவார்கள்

ஒன்றில்

ஒரே ஒரு சிம்மாசனம் மட்டும் 

இருக்க

அதில் வீற்றிருந்து 

ஆட்சி செய்யும்

ராமனின் பாதுகைகள்

இன்னொன்றில்

சிம்மாசனமே இருக்காது

இரண்டு ராமராஜ்யங்களும்

சந்தித்துக்கொண்டன

ஒன்று

‘ஜெய்ஸ்ரீராம்’ என்று சொல்லிக்

கையில் வில்லெடுத்து

அம்பெய்தது

இன்னொன்று

‘ஹே ராம்’ என்று சொல்லி

மார்பில் அந்த அம்பை வாங்கி

மண்ணில் வீழ்ந்தது

         - ஆசை

கீழ்க்கண்ட கவிதைகளையும் தவற விடாதீர்கள்: 

1. திருவாளர் கோட்சேவை ஒன்றும் சொல்லாதீர்கள்

2. ஆஷிஸ் நந்தி பின்னுரையோடு ஒரு நாடகம்

3. ஜெய் ஹே

4. ஹே ராவண்

5. துப்பாக்கித்தனத்தை வீழ்த்தும் உடல்

6. தோட்டாவுடன் ஒரு ஒப்பந்தம்

7. தோட்டாவுக்கு ஒரு நினைவு மண்டபம்

8. அல்லாஹூ அக்பர்

 

9. வடுவூர் ராமர்

10. மராமரப் படலம்

11. பெருங்கோயில்

12. மாமத ராஜா

13. பிரபஞ்சத்தின் மாபெரும் சர்வாதிகாரி

14. எல்லோருக்குமாம் ஒரு இன்னறுங் கனிமரம்

கடவுளர்களுக்கும் அனுமதிக்கப்படாத உண்டியல்

எனக்குக் கடவுள் நம்பிக்கை

இல்லை

ஆனால் கடவுள்களை

எனக்குப் பிடிக்கும்

அவர்களெல்லாம்

மனிதர்கள் விதவிதமாகச் செய்த

உண்டியல்கள்

கிராமத்து மரத்தடிகளில்

சின்ன உண்டியல்களில் ஆரம்பித்து

பெரியகோயில்களில்

கர்ப்பகிரகத்தின் உள்ளே இருக்கும்

பெரிய உண்டியல்கள் வரை

ஏராளமான உண்டியல்கள்

அந்த உண்டியல்களில்

புவியின் அத்தனை நம்பிக்கைகளும்

வேண்டுதல்களும்

பாவங்களும்

சாபங்களும்

ஆசைகளும்

தேர்வு எண்களும்

கொட்டப்படுகின்றன

அந்த நம்பிக்கைகள்

வேண்டுதல்கள்

பாவங்கள்

சாபங்கள்

ஆசைகள்

மிக அழகியவை

அவற்றுக்கான ஒரே உண்டியல்

என்பதால்

கடவுளர்களை

எனக்கு மிகவும் பிடிக்கும்

சிறுவர்களாய் இருக்கும்போது

சிறிய மாரியம்மன் கோயிலில்

மாரியம்மன் கண்முன்னே

வேப்பங்குச்சியில் தாரை ஒட்டி

உண்டியலில் விட்டுக்

காசு திருடினோம்

நானும் கூட்டாளிகளும்

பாவமாகப் பார்த்துக்கொண்டிருந்தாள்

மாரியம்மன்

எப்போதோதான் அங்கே ஆட்கள் வருவார்கள்

எப்போதோதான் உண்டியலில் காசு விழும்

கடவுளர்களைப் படைத்துவிட்டு

அவர்களுக்குள் எல்லாவற்றையும் கொட்டும்வரை

பிரச்சினை இல்லை

அவர்களுக்குள் குச்சி விட்டு

நோண்டிக்கொண்டிருப்பதுதான் விபரீதம்

அப்படி நோண்டவும்

குழந்தைகளுக்கு மட்டுமே

அனுமதிக்கப்பட்டிருக்கிறது

குழந்தைகள் தங்கள்

பொம்மை உண்டியலை

எத்தனை முறை வேண்டுமானாலும்

தூக்கிப்போட்டு

உடைக்கட்டும்

மற்றவர்கள்

உண்டியலில் போட வேண்டியதைப்

போட்டுவிட்டுத்

திரும்பிப் பார்க்காமல்

போய்விட வேண்டியதுதான்

தங்களுக்குள் வந்து விழுவதைக்

கடவுளர்கள் கூட ஏறெடுத்துப் பார்ப்பதில்லை

-ஆசை

ஜட்டியின் ஆன்மா

பிள்ளைகள் கலைத்துப்போட்டு

விளையாடியதில்

துவைத்த துணி

அழுக்குத் துணி

எல்லாம்

ஒன்றாய்க் கலந்து

கிடக்கின்றன

இன்று போட்டுக்கொள்ள

ஜட்டி வேண்டும்

எடுத்து முகர்ந்துபார்க்கிறேன்

ஒவ்வொன்றாய்

எது துவைத்தது

எது துவைக்காதது

என்று அடையாளம் காண

இயலவில்லை என்னால்

நாளானால்

அழுக்கும் தன் நாற்றம்

இழக்கிறது

ஜட்டியில்

குடிபுகுந்த பின்

அங்கே ஏற்கெனவே அடைபட்டிருக்கும்

ஜட்டியின் ஆன்மாவுடன்

அழுக்கு பேசியிருக்கும்

வந்தபோது இருந்த

தன் மணத்தையும்

தான் எப்போதோ

இழந்த கதையைச் சொல்லி

ஜட்டியின் ஆன்மா

அழுதிருக்கும்

அதன் பின்

உணர்ந்திருக்கும்

ஜட்டியின் அழுக்கு

எதையும் விடாப்பிடியாக

பிடித்து வைத்திருக்க வேண்டிய

அவசியம் இல்லையென்று

நாள்பட்ட அழுக்குதான்

ஆன்மா ஆகும்

நாள்பட்ட அழுக்குதான்

ஞானமடையும்

ஆனால்

நான் இப்போது

அணிந்திருப்பது

நாள்பட்ட அழுக்கின் ஞானமா

இல்லை

துவைத்து ஆன்மா வெளியேற்றப்பட்ட ஜட்டியா 

- ஆசை

பிரபஞ்சத்தின் மாபெரும் சர்வாதிகாரி

சார்லி சாப்ளினின் ‘த கிரேட் டிக்டேட்டர்’ திரைப்படத்திலிருந்து

1.

மாபெரும் அடினாய்டு ஹிங்கல்

உம்மை நாங்கள் ஆராதிக்கிறோம்

என்றுமுள்ள சர்வ வல்லமைகொண்ட 

ஒரே சர்வாதிகாரி நீங்கள்

உம் ஆதிக்கத்துக்கு

அகில உலகமும்

அடிபணிவதாக

இவ்வுலகை 

ஒரே குடையின் கீழ் கொண்டுவரும்

உம் அகண்ட தேசக் கனவின்

நிழலில் என்றும் வாழ்ந்திருக்கப்

பேரவா கொண்ட சிறுபூச்சி நாங்கள்

உம் மகிமையின் 

மகுடத்திலிருந்து உதிரும்

மயிலிறகுகள்

என்றும் எமக்கு

சாமரம் வீசட்டும்

உம் வாக்குக் காற்றின் வேகத்தில்

உம் வாய்க்கு முன் 

ஒலிபெருக்கியின்

ஒலிவாங்கித் தண்டுகள்

அஞ்சி வளைந்து

நடுங்குவதுபோல்

எங்கள் உள்ளமும்

நடுங்கி வளைகிறது

உம் ஒரே நாடு 

ஒரே சர்வாதிகாரி

ஒரே இறைவன்

ஒரே மொழி

ஒரே சிந்தனை

ஒரே இனம்

என்ற மாபெரும் கனவு

எங்கள் மனத்திரையில்

படமாக விரியும்போது

வெம்மை தாளாமல்

தீப்பிடிக்கிறது

அந்தத் தீச்சூடு தாளாமல்

எங்கள் ரோமங்கள் 

குத்திட்டுக் கூர்ஈட்டியாய் நிற்கின்றன

வாய்களோ 

உன்னதக் கனவுக்கு

உரத்த கோஷம் 

பொறிபறக்கக் கக்குகின்றன

கைகளோ காட்டுத்தீச் சுவாலைகளாய்

மேலெழுந்து ஆர்ப்பரிக்கின்றன

என்றுமுள்ள சர்வ வல்லமைகொண்ட 

ஒரே சர்வாதிகாரி 

அடினாய்டு ஹிங்கல்

உம்மை நாம் ஆராதிக்கிறோம்

2.

நிற்க

உமக்கான ஆராதனையை அடுத்து

உம்மேலுள்ள விசனமொன்றை

உம்முன் வைப்பதற்கு 

மன்னிக்க வேண்டும் தேவரீர்

சென்றமுறை

உம்மைச் சந்திக்க வந்தார்

உம்மைப் போன்ற கனவுகொண்ட

இன்னொரு சர்வாதிகாரி

நல்ல பெயர் கொண்ட

நப்போலினி

அவர் திமிர் அடக்க

உம் உயரம் காட்ட

உமக்கு உயரமாகவும்

அவருக்குத் தரையொட்டியும்

இருக்கை சமைத்தீர் நன்று அய்யா

ஆனால்

இருக்கை உயரம் போதாமல்

அவர் உம் மேசைமேல்

ஏறியமரத்

திடுக்கிட்டு நீங்கள்

சமைந்ததை

உம் பக்தர்கள் நாம்

எப்படி ஏற்பது

முக்காலத்துக்கும் வாய்க்கால் வெட்டி

அதில் உம் மதுரவாய்ப் பாசனம்

செலுத்துபவரே

இதை முன்னறிய மறந்தீரே

3.

அய்யா

அடுத்த முறை

உலகின் சர்வாதிகாரிகள்

உமை நோக்கி வரும்போது

ஒரே ஒரு நாற்காலி சமையும்

அதில் நீர் மட்டுமே அமையும்

முன்னே மேசையின்றித்

தரைவிரிப்பில்

அவரெல்லாம் 

அமரச் செய்யும்

எம் தேசம்

ஒரே தேசம்

அதில் ஒரே ஒரு நாற்காலிதான்

என்று சொல்லும்

எம் நாட்டில்

விருந்தினர் உபசரிப்பு முறையிதுவே

என்று அவரெல்லாம் ஆற்றுப்படுத்தும்

உம்மைப் பார்த்துவிட்டுச் செல்லும்போது

அவரின் ‘சர்வ’த்தையெல்லாம்

உருவிவிட்டு

வெறும் அதிகாரிகளாய்

வழியனுப்பும்

4.

பூமிப் பந்தின் மேல்

ஒரே சிம்மாசனம் அமைத்து

அதன் மேல் வீற்றிருந்து

பூமி மேல்

நிதம் மும்மாரி

நீர் பெய்வதைப்

பார்த்துவிட்டுக் கண்மூட வேண்டும்

பின் வரும் தலைமுறைகள்

நீர் பெய்த மும்மாரிதான்

உலகுசூழ் 

உப்பு ஆழிகளாயிற்று

என்று இதிகாசங்கள்

இயற்ற வேண்டும்

அதுதான் ஐயன்மீர்

எம் ஒரே ஆசை

5.

ஆயினும் ஓர் ஆபத்து

உம்மை விடப் பெரிய ஆசனத்தைப் 

போட்டு ஒருவர் 

இப்பிரபஞ்சத்தின் மேல் அமர்ந்திருக்கிறார்

அவரை அவ்விடம்

அகற்றி

அங்கே நீவிர் 

அமர வேண்டும்

அதுவரை அவர் தொழுத

அமரர்க்கெல்லாம் 

நீவிர் சர்வ அதிகாரி 

ஆக வேண்டும்

இப்படியாக

நீவிர் புதிய தேசம்

புதிய உலகம் படைப்பதுபோல்

புதிய பிரபஞ்சமும் படைக்க வேண்டும்

அதன் ஒவ்வொரு

நட்சத்திரத்துக்கும்

பழைய பெயரகற்றி

உம் பெயரையே

வைக்க வேண்டும்

நட்சத்திரம் கண்சிமிட்டும்போதெல்லாம்

அது காட்டித் 

தன் குழந்தைக்குச் சோறூட்டும்

தாயெல்லாம்

‘அதோ பார்

அடினாய்டு ஹிங்கல்

கண்சிமிட்டுகிறார்’

என்று சொன்னால்

மேலும் ஒரு கவளம்

சோறிறங்காதா

தேவரீர்

          - ஆசை, 09-09-23

குறிப்புகள்: 

1. ஹிட்லரைப் பகடி செய்து 1940-ல் சார்லி சாப்ளின் எடுத்த ‘த கிரேட் டிக்டேட்டர்’ (The Great Dictator) திரைப்படத்தின் தாக்கத்தால் எழுதிய கவிதை. அந்தப் படத்தில் ஹிட்லரை நினைவுபடுத்தும் பாத்திரத்துக்கு அடினாய்டு ஹிங்கல் என்றும், முசோலினியை நினைவுபடுத்தும் பாத்திரத்துக்கு பென்ஸினோ நப்போலினி என்றும் சாப்ளின் பெயர் வைத்திருப்பார்.

2. வேறு ஏதும் இல்லை.

கீழ்க்கண்ட கவிதைகளையும் தவற விடாதீர்கள்:

1. இரண்டு ராமராஜ்யங்கள்

2. ஜெய் ஹே

3. மாமத ராஜா

4. எல்லோருக்குமாம் ஒரு இன்னறுங் கனிமரம்

5. துப்பாக்கித்தனத்தை வீழ்த்தும் உடல்

6. திருவாளர் கோட்சேவை ஒன்றும் சொல்லாதீர்கள்