திருவாளர் கோட்சேவை
ஒன்றும் சொல்லாதீர்கள்
திருவாளர் கோட்சேவின் துப்பாக்கியை
மந்திரவிசை போல் தன் மார்பை
நோக்கி நீளச் செய்தது
அவ்வளவாகத் திருவாளர் இல்லாத
காந்தியின் நெஞ்சுதான்
மூன்று தோட்டாக்களை
அடுத்தடுத்து உறிஞ்சிக்கொண்டதும்
அவரது நெஞ்சுதான்
தன் துப்பாக்கியிலிருந்து
பிடுங்கப்பட்ட
மூன்று தோட்டாக்கள்
எங்கே என்று
திகைத்துப் போன திருவாளர் கோட்சே
இன்னும் அதே இடத்தில்தான்
நிற்கிறார்
அவரைக் கொஞ்சம்
சாந்தப்படுத்தி
உட்கார வைக்கலாம்
இன்னொரு துப்பாக்கி தருகிறோம்
இனிமேல் நீங்களே சொந்தமாகச் சுடுங்கள்
என்று ஆறுதல் சொல்லலாம்
ஆனால்
அவ்வளவாகத் திருவாளர் இல்லாத காந்தியின்
முன்னால் மட்டும் சென்றுவிடாதீர்கள்
சுட்டது நீங்கள்தான் என்ற பெருமையை
உங்களிடமிருந்து
பறித்துவிடுவார்
என்பதை மட்டும்
திருவாளர் கோட்சேவிடம் சொல்லிவிட வேண்டும்
- ஆசை
(காந்தியைத் திரும்பத் திரும்பச் சுட முயல்பவர்களுக்கு, பரிதாபத்துடன்)
கீழ்க்கண்ட கவிதைகளையும் தவற விடாதீர்கள்:
.jpg)
No comments:
Post a Comment