இந்தப் பிரபஞ்சத்தின் மையம் தேடி ஒரு வேள்வி

என்றாவது யோசித்ததுண்டா நீங்கள்
உங்கள் மூளை ஏன்
இன்னொருவர் தலையில் இல்லை என்று
உங்கள் தலைக்குள் இருப்பது

இன்னொருவர் மூளையோ என்று

உங்கள் மூளைக்குள் இருப்பது

இன்னொருவர் மனமோ என்று

உங்கள் உடலில் இருப்பது

இன்னொருவர் கைகளோ என்று

உங்கள் புலன்களில் இருப்பது

இன்னொருவர் உணர்வுகளோ என்று

நீங்கள் எங்கே போகிறீர்கள் என்று 

யாராவது கேட்டால்
என் மூளையை பார்க்கச்
சென்றுகொண்டிருக்கிறேன்
என்று சொன்னதுண்டா

எங்கோ என் மனதை வைத்துவிட்டேன் என்று 

நீங்கள் தேடியது உண்டா

உண்மையில் எதுவும் 

அதனதன் இடத்தில் இல்லை

அதனால்தான்
தலைக்கு மேல் மயிரிலிருந்து
தலைக்கு உள்ளே மூளையிலிருந்து
அதற்கு உள்ளே மனதிலிருந்து
இன்னும் புலன்கள் உணர்வுகள்
குறி குறிமயிர்
கால்கள்  
அனைத்துமே
இந்த நீட்டம் நீட்டுகின்றன
இந்த அலைச்சல் அலைகின்றன

அங்கொன்றும் இங்கொன்றுமாகத் 
தட்டுப்படுவதையெல்லாம்
எடுத்து வைத்துக்கொண்டு
தடவித் தடவி
ஆறுதல் கொள்கின்றன

உங்கள் பிரச்சினை
என்னவென்றால்
இதையும் நம்பிவிடுவீர்கள்
அவ்வளவு
சர்வநிச்சயம்
தேவைப்படுகிறது

நான்
அப்படியெல்லாம்
இருக்க மாட்டேன்
அதோ அங்கே போகிறாரே
அவரிடம் உள்ள என் கையைப்
பிடித்து
இதோ இங்கே இருக்கிறானே
இவன் கன்னத்தில்
மாறி மாறி அறையப் போகிறேன்

இந்த உலகம்
எவ்வளவு சிக்கலானது
என்பதைப் பிறர்க்கோ
எனக்கோ நிரூபிக்க
இங்கிருந்தே
தொடங்க வேண்டும்

ஆனால்
அதற்கு முன்னரே
'இங்கு'வையும் 'இதோ'வையும்
சந்தேகிக்க ஆரம்பித்துவிட்டேனே
இங்கிருந்தோ
எங்கிருந்தோ

இவ்வளவு
குழப்பத்துடன்
ஒரு பிரபஞ்சமும்
கவிதையும் தேவையா

     -ஆசை