ஜட்டியின் ஆன்மா

பிள்ளைகள் கலைத்துப்போட்டு

விளையாடியதில்

துவைத்த துணி

அழுக்குத் துணி

எல்லாம்

ஒன்றாய்க் கலந்து

கிடக்கின்றன

இன்று போட்டுக்கொள்ள

ஜட்டி வேண்டும்

எடுத்து முகர்ந்துபார்க்கிறேன்

ஒவ்வொன்றாய்

எது துவைத்தது

எது துவைக்காதது

என்று அடையாளம் காண

இயலவில்லை என்னால்

நாளானால்

அழுக்கும் தன் நாற்றம்

இழக்கிறது

ஜட்டியில்

குடிபுகுந்த பின்

அங்கே ஏற்கெனவே அடைபட்டிருக்கும்

ஜட்டியின் ஆன்மாவுடன்

அழுக்கு பேசியிருக்கும்

வந்தபோது இருந்த

தன் மணத்தையும்

தான் எப்போதோ

இழந்த கதையைச் சொல்லி

ஜட்டியின் ஆன்மா

அழுதிருக்கும்

அதன் பின்

உணர்ந்திருக்கும்

ஜட்டியின் அழுக்கு

எதையும் விடாப்பிடியாக

பிடித்து வைத்திருக்க வேண்டிய

அவசியம் இல்லையென்று

நாள்பட்ட அழுக்குதான்

ஆன்மா ஆகும்

நாள்பட்ட அழுக்குதான்

ஞானமடையும்

ஆனால்

நான் இப்போது

அணிந்திருப்பது

நாள்பட்ட அழுக்கின் ஞானமா

இல்லை

துவைத்து ஆன்மா வெளியேற்றப்பட்ட ஜட்டியா 

- ஆசை