ஆசை: ஆசையின் ‘அண்டங்காளி’ கவிதைத் தொகுப்பைக் குறித்து...

தேன்மொழி தாஸ்

கவிதை என்பது குறைந்தபட்சமாக எழுதுபவரின் இரவுகளையும் அதிகபட்சமாக அவர்கள் தம் வாழ்வையும் பலியாகக் கேட்கும் சக்தி எனலாம் . கவிதை காலங்களைச் சூடி காலங்களை யார் மூலமாகவேனும் எழுதி வைத்துக்கொள்கிறது. உண்மையில் ஒரு கவிஞனின் வரிகள் என்பது சமூகத்தின் குரலே. காதலைப் போராட்டங்களை, தத்துவங்களை, பசியை, காமத்தை, பக்தியை, தேசத்தை விடுதலையை, ஒடுக்குமுறையை, அகத்தை, புறத்தை இப்படி எதை எழுதினாலும் அது நிலத்திலிருந்து மேலோங்கி அந்தரத்தில் நின்று யாவருக்குமாகிறது . ஒவ்வொரு மனதும் அகத்தால் புறத்தோடு... புறத்தால் அகத்தோடு கட்டப்பட்டு ஒரு மெல்லிய அன்பொலியால் ஆளப்படுகிறது. சுவாசத்தை விட இருப்புக்கு ஒரு இனிய விருப்பம் ஜீவநாடியாகத் தேவைப்படுகிறது. இறுதி மூச்சு வரை இருப்பை உறுதி செய்வதில் மனம் பெரும் பங்கை எடுத்துக்கொள்கிறது.

அத்தகைய கவி மனம் இருப்பை ஆடும் கூத்தாக்கி ஆடச் செய்யும் இயற்கையைப் பெண்ணாய் வணங்கும் ஒரு புள்ளியில் சக்தி உயிர்கொண்டு துடி கொண்டு சுரக்கும்.

அண்டங்காளி அப்படி ஒரு துடி நடனச் சன்னதக் கவிதைகளால் , வாக்குகளால் வாக்குகளுக்கு வாசல் வைக்கிறாள். எக் கதவைத் தொட்டாலும் துடி குன்றாது நாவை நீட்டும் அவளை காதலாகவும், உடலாகவும், பேயாகவும், தாயாகவும், மாயமாகவும் உறவாடி மகிழும் கவிதைகள். இக் கவிதைகளைப் பிரார்த்தனைகளாய்க் காண்கிறேன்

பாதிப் பிறப்பு தந்தாய்
உடலே ஒரு காலாய்
இப்பிறவில் நடக்கிறேன்
மீதிப்பிறப்பின் ஒரு கால்
நடப்பது எங்கே

இந்த வரிகளில் உதடு துடிக்க அழும் ஒரு ஆன்ம பிராத்தனை வெளியெங்கும் காற்றாவதை உணர்கிறேன். தன் உச்சபட்சமான உயிர் அள்ளிப் படையலிட்டு வேண்டும் கவிதைகள். ஒரு மனதூடே யாவருக்குமாய் பரவும் பிரவாகத் துடி . இடாக்கினிக்கும் வாரிணிக்கும் பலியிட ஏதுமில்லாதபோது தனது தலையை வெட்டி இரத்தம் ஊட்டிய அரிதலைச்சியின் தியாகமாய் நன்றியின் நீரூற்றாய், தான் ஏகமனநிலைப்பட்டுத் துதிக்கும் ஒருத்திக்கு தன்னையே சொற்பலியிடும் கவிதைகள்... அண்டங்காளியில்

பிரபஞ்சப் பெருமுலை திரட்டி
ஒற்றைக் காம்பின் வழி
அமுதூட்டு அம்மா

எனும் இவ்வரிகளில்... உலக உருவாக்கம் மூன்றே நாளில் எப்படி வெடித்துப் பூர்த்தியாகி இருக்கும்! ஆயிரம் ஆயிரம் அறிவியல் ஞானத்தின் அமுதக் கண் யார்... எவ்வழியே யார் யாருக்காக மொழியின் பால் ஊறிக் கடந்திருக்கும் . நமது மரபின் நஞ்சுக்கொடி எல்லா வண்ணத்திற்கும் தாயாம் - கருப்பு என்று தலை தாழ்ந்து வணங்கி இருகை நீட்டி ஆழ் மனம், வான்தனை உச்சிமோந்து பிரபஞ்சத்தை முத்தமிடும். யார் வந்து, யார் சென்று, யார் பிறந்தாலும், சகலருக்கும் கேள்வியின்றி சோறூட்டும் பிரபஞ்சத்தை வழிபட்டு வழிபட்டே தீரா காமமாகும் கவிதைகள். காமம் மீறக் கருணையாகும் வித்தைகள்... வித்தைகள் தேங்க சன்னதமாகும் அழுத்தங்கள்... அழுத்தங்கள் தேய அழுகையாகும் அவயங்கள் என

அண்டங்காளி கவிதைத் துடி
எல்லாப் பக்கங்களிலும் அனல் மாறா இசை.

வாழ்த்துகள் ஆசை

இத்தொகுப்பை முகநூல் மூலம் வெளியிடுவதில் நான் பெருமகிழ்ச்சி அடைகிறேன். இக் கவிதைகளை நான் வாசிக்கையில் அடைந்த இன்பம் யாவருக்கும் புதிதாக வேண்டும் என்று அநேக கவிதைகள் மேற்கோள் காட்டவில்லை. அவை தந்த ஒலியின் சிறு துண்டை இங்கே பொத்தி வைத்திருக்கிறேன் . இத் தொகுப்பை வாங்கிப் படித்து மகிழ பரிந்துரைக்கிறேன்

ஆசைக்கும் இக் கவிதைகளை நூலை வெளியிடும் டிஸ்கவரி புக் பேலஸ்க்கும் வாழ்த்துகள்.

அண்டங்காளி

ஆசை

விலை: ரூ.100

புத்தகத்தை வாங்க: டிஸ்கவரி புக் பேலஸ் – 8754507070

அமேஸானில் வாங்க: https://amzn.to/3d6QxEb

அன்புடன்

- தேன்மொழி_தாஸ்

(‘அண்டங்காளி’ கவிதைத் தொகுப்பை 2021-ல் முகநூலில் வெளியிட்டுக் கவிஞர் தேன்மொழி தாஸ் எழுதிய குறிப்பு)

எனது நூல்கள் தொடர்பாக எழுத்தாளர்கள், விமர்சகர்களின் கட்டுரைகள்:

எழுத்தாளர் எஸ்.ராமகிருஷ்ணன்: கவிஞர் ஆசை (என்னைப் பற்றிய பொது அறிமுகம்)

பேராசிரியர் தங்க. ஜெயராமன்: மாம்பழ நிறப் புடவைக்குக் கறுப்பில் கரைக்கட்டு நெய்யும் கலை