நீராலான கைகள்

முன்னே நிலம்

எதிரே சமுத்திரம்

நிலத்தின் கைகளில் லத்தியுண்டு

கற்களுண்டு

தீயுண்டு

தீயுண்டு தீயுண்டு

உமிழும் கண்களுண்டு

கண்களற்ற சமுத்திரத்திடம் இருப்பதோ

வெறும் கைகள்

உயர்த்திய வெறுங்கைகள்

நீராலான கைகள்

நிலம் கொண்டுபோய்க் கரைத்த

அகிம்சையெல்லாம் எழுந்து நிற்கிறது

உயர்த்திய கைகளாய்

ஓங்கி ஓங்கித் தரையை

ஓயாமல் இனியெப்போதும் அறையும் கைகளாய்

காலங்காலமாகக் கைகள் கரைக்கப்பட்ட சமுத்திரம்

காலங்காலமாகக் கைகள் கழுவப்பட்ட சமுத்திரம்

உயர்த்துகிறது கோடிக் கைகளை

மானுட சமுத்திரத்தின்

எல்லையெங்குமுள்ள கைகளை

ஒன்றுசேர்க்கும் சமுத்திரத்தின்முன்

உங்களால் ஒன்றும் செய்ய முடியாது

தீயின் கரங்களே

திரும்பிச் செல்லுங்கள்

 -ஆசை

 -24-01-2017