1.
அலங்கோலம்
அது புறப்பட்ட இடம்
ஆபரேட்டர் அறையின்
சிறு ஒளிப்பொந்து
விழும் இடம்
ஐமேக்ஸின்
பெருந்திரை
நடுவே மாட்டிக்கொண்ட நான்
என்ன செய்வது
ஆப்பரேட்டர்
ஆப்பரேட்டர்
அலறல்
அவர் காதில் விழுவதில்லை
உண்மையில்
அவர் இருக்கிறாரா
ஒளிப்பொந்தைக்
கையால்
அடைக்கிறேன்
அப்படியும்
திரையில் பேரொளி
பேரலங்கோலம்
அப்படி
என்ன ஒளி அது
அச்சிறு
அப்பொந்தை
உடல் கொண்டு
அடைக்க முயன்றும்
அடைக்க முயன்றும்
தோற்கிறேன்
ஒரே ஒரு தீக்குச்சி
இருந்தால்
திரையைக் கொளுத்தலாம்
நானோ
ஒரே ஒரு தீக்குச்சி கொண்டுவரும்
அதன் ஒரு உரசலில்
என்னைக் கொளுத்திவிடும்
ஒரே ஒரு தேவதைக்காக
ஒளிப்பொந்துக்கும்
ஒளித்திரைக்கும் இடையே
இருளில் தவம்கிடக்கிறேன்
2.
அலங்கோலம்
வீடு முழுவதும்
அலங்கோலம்
அலமாரிகளைப் பலமடங்கு மீறிய
புத்தகங்கள்
துணிமணிகள்
விளக்குமாற்றையும்
தரைத்துடைப்பானையும் மீறிய
குப்பைகள்
தூசிகள்
மெத்தை போர்வைகளை
மீறிய
சின்னவன் மூத்திரத்தின்
முடைநாற்றம்
அலங்கோலத்தின்
வழிகளையே
தம் விளையாட்டுத் திடலாய்
மாற்றிக்கொள்ளும் பிள்ளைகள்
தலைச்சுற்றி வெடிக்கிறது
ஒரு மனைவி
ஒரு அம்மா
ஒரு பணிப்பெண்
ஒரு நண்பர்
சற்றே வளர்ந்த மூத்தவன்
அல்லது
முன்பு வரத் தவறிய தேவதை
யார் நினைத்தாலும்
ஒரு கை நீட்ட முடியும்
நீட்டுகிறார்கள்தான்
ஆனால்
அவர்கள் கையைப் பெற்றுக்கொள்ள
என்னிடம்
மறு கை இல்லை
ஒரு மனதை வைத்துக்கொண்டுதான்
எல்லா அலங்கோலத்தையும்
துடைத்தெறிய முடியும்
என்று
எவ்வளவு நாள்தான்
நினைத்துக்கொண்டிருப்பது
கையே
இல்லாமல்
-ஆசை
No comments:
Post a Comment