Saturday, April 5, 2025

உன் அருளின் ஒரு துளி

ஓவியம்: லியானார்தோ டா வின்சி


நேரில் பழக்கமில்லை
முகப் புத்தகத்தில்
நண்பர்கள்
ஆயினும்
ஒருவருக்கொருவர்
விருப்பக்குறி
இட்டதில்லை
ஒரு நொடி
நிறுத்தும்
கருத்தோ
படமோ
அவர் சுவரில்
கண்டதில்லை
அவருக்கும் நான்
அப்படியே
இருந்திருக்கலாம்
ஏதோ வெறுப்பு
சட்டென்று
கடந்துவிடுவேன்
இன்றறிகிறேன்
அவர்
உன் தெருக்காரர் என்று
என்தவம்
என்னிறைஞ்சுதல் போல்
ஏதுமின்றி
அவர் குரல் உன்செவி
உன்குரல் அவர்செவி
அவருரு உன்விழி
உன்னுரு அவர்விழி
அடைதலை
எத்தனை முறை
வாய்க்கப்பெற்றிருப்பார்
உன் மாபெரும்
அருள் வற்றி
ஒருசிறு
துளியாவது
எஞ்சியிராதா
அவருள்
அச்சிறு துளி
ஆர்ப்பரித்துச் சூழ்ந்துகொள்கிறது
என்னை
கடலளவு நேசம் அவர்மேல்
பிறப்பிக்கச் சொல்லி
ஏதோ
உன்விழி
உன்குரல்
எட்டியவர்களையெல்லாம்
நேசித்தால்
உன்னை
எட்டிவிடலாம் என்பது போல
கிறுக்குத்தனம்தான்
ஆனால்
அதுவொன்றே
என்னைக் கிறுகிறுத்து
ஆட்டிவைக்கிறது
-ஆசை

Friday, April 4, 2025

உன் பதினெட்டு வயதின் பட்டம்


உன் பதினெட்டு வயதை விட்டு
வெகு தொலைவில் போய்விட்டாய்
அது ஒரு பட்டமாய்
இன்னும் அங்கேதான்
பறந்து கொண்டிருக்கிறது
அதன் மேல்தான்
நானும் மிதக்கிறேன்
நூலறுந்து போயிருந்தாலும்
என்னை
கீழே தள்ளி விடாமல்
காப்பாற்றி
ஏந்தியிருக்கிறது
உன் பதினெட்டு வயதின் பட்டம்
சற்றே நழுவினாலும்
உன் 42ன் மீதோ
என் 43ன் மீதோ
விழுந்துவிடுவேன்
அந்தரம்
பதினெட்டு
ஏறிச்செல்லும்
ஒருவழிப் படிக்கட்டு
அதில்
தனியாக நான்
ஏறிச்சென்றதால்தான்
உனக்கே இனி
வாய்க்காத
உன் பதினெட்டின் அருகாமை
எனக்கெப்போதும்
வாய்க்கிறது
உன் பதினெட்டின் மேல்
என்றும் மலர்ந்திருக்கும்
என் பதினெட்டைப் பார்க்கவே
நீங்காமல்
அங்கிருப்பேன்
இப்போதுன்
பிறந்தநாளுக்கு
நான் பூத்தூவுவது
அங்கிருந்துதான்
என்ன பூ வென்று
எடுத்துப் பார்த்துத் திகைக்காதே
அது உன் பதினெட்டு
உனக்கனுப்பும்
இறவாமைத் திறவுகோல்
- ஆசை

Thursday, April 3, 2025

சிறுமீனைக் கவ்விய பெருஞ்சிறுமீன்


சிறுமீனைக் கவ்விய
பெருஞ்சிறு மீனைக்
கண்டேன்
மீன்காரம்மா கூடையில்
கவ்வியபோது பிடிக்கப்பட்டதா
அல்லது
பாம்பு பற்றித்
தொங்குபவனுக்கு வாயில்
தேன் வந்து விழுந்ததுபோல்
வலைக்கு வந்தபின்
கவ்வியதா
அல்லது
கூடையில் கொட்டியபோது
பிளந்த வாய்க்குள்
நேரே சென்று
சிறுமீன் விழுந்ததா
(உள்ளே விழித்த விழிப்பில்
என்ன கண்டிருக்கும் சிறுமீன்
நழுவும் துடிப்பொன்றின்மேல்
தன்துடிப்பும்
தாளமிட்டே நழுவுவதையா)
மீன் கவ்விய மீன் கவ்விய மரணம்
அதை மட்டுமே விற்கிறார்
மீன்காரம்மா
தன் கூடையில்
வாழ்வு உண்டு செரிக்க
கவ்விய
கவ்விய
கவ்விய
என் கவ்வலே
-ஆசை, ‘குவாண்டம் செல்ஃபி’ (2021) கவிதைத் தொகுப்பிலிருந்து