Monday, August 28, 2023

யாருமில்லாத பிரபஞ்சத்தில் ஒரு தேன்சிட்டு

 




வரலாறு என்பது
வேறெதுவுமில்லை
தேன்சிட்டு தேன் குடித்தது
தேன்சிட்டு தேன் குடிக்கிறது
தேன்சிட்டு தேன் குடிக்கும்
அவ்வளவுதான்
என்று
முன்பு எழுதியிருந்தேன்

இப்போது அதற்கு
வருந்துகிறேன்

தேன்சிட்டு இல்லாமல் போகும் 
காலத்தையும்
தேன்  இல்லாமல் போகும் 
காலத்தையும்
வரலாறு  இல்லாமல் போகும் 
காலத்தையும்
ஏன்
கவிதையே  இல்லாமல் போகும் 
காலத்தையும்
காலமே இல்லாமல் போகும்
காலத்தையும் பற்றி
நான் எழுதியிருக்க வேண்டும்

இந்நிலையில்
யாருமில்லாத டீக்கடையில்
யாருக்காக டீ ஆற்ற வேண்டும்
என்ற கேள்வி இயல்பானதே

ஆனாலும்
யாருமில்லாத டீக்கடையில்
யாரோ எப்போதோ ஆற்றிய டீதான் 
இப்போது
ஆறாய்ப் பெருகி ஓடுகிறது என்பதை 
மறக்கக் கூடாது

பழைய பழக்கத்தில்தான்
இன்னும் டீ ஆற்றுகிறோம்
டீயாக இருக்கிறோம்
தேன்சிட்டாக இருக்கிறோம்
தேன் குடிக்கிறோம்
வரலாறு எழுதுகிறோம்
கவிதை எழுதுகிறோம்
காலம் ஆகிறோம்

இல்லாமல் போவதென்பது
பழக்கத்திலிருந்து
முற்றிலும் விடுபடுவது

ஒரு தேன்சிட்டு இல்லாமல் போய்விடும்
என்பதும்
அது அதற்கே தெரியாது என்பதும்
அது இல்லாமல் போய்விடும்போது
முன்பு தான் இருந்தது
அதற்குத் தெரியுமா தெரியாதா என்பதை
நாம் ஒருபோதும்
அறிந்துகொள்ள முடியாது என்பதும்
எவ்வளவு பெரிய துயரம்

அந்தத் துயரத்தை
ஆற்றிக்கொள்ளவாவது
யாருமில்லாத பிரபஞ்சத்தில்
ஒரு தேன்சிட்டு
தேன்குடித்துக்கொண்டிருப்பது பற்றி
நான் கவிதை எழுதித்தான் 
ஆக வேண்டும்
       - ஆசை

Thursday, August 17, 2023

அதிகாரம் என்பது தலித் மக்களுக்கு வெறும் கனவா?



ஆசை


I

அப்போது 2016 சட்டமன்றத் தேர்தல் முடிவுகள் வெளியாகிக்கொண்டிருந்தது. பலருக்கும் மிகுந்த வலியை ஏற்படுத்திக்கொண்டிருந்த விஷயம் விடுதலைச் சிறுத்தைகள் தலைவர் திருமாவளவன் பின்தங்கிக்கொண்டிருந்ததுதான். மிகக் குறைவான வாக்குகள் வித்தியாசம்தானே, எப்படியும் அவர் வென்றுவிடுவார் என்றே பலரும் நம்பிக்கொண்டிருந்தார்கள். அப்படியும் 87 வாக்குகள் வித்தியாசத்தில் அவர் தோல்வியடைந்தார். தேர்தல் ஆணையத்தின் இணையதளத்துக்குச் சென்று பார்த்தால் இன்னொரு விஷயமும் அதிர்ச்சியை ஏற்படுத்தியது. அதே தொகுதியில் டி. திருமாவளவன் என்பவர் சுயேச்சையாக நின்று 289 ஓட்டுக்கள் பெற்றிருந்தார். அந்தத் தொகுதியில் நோட்டாவுக்காக விழுந்த ஓட்டு 1,025. இந்தக் கணக்குகள் சொல்லும் செய்திகள் புரிந்துகொள்வதற்கு அவ்வளவு கடினமானவை அல்ல. இத்தனைக்கும் அது தனித்தொகுதி; வென்றவரும் தலித் சமூகத்தினர்தான். ஆனால், அவர் தலித் சமூகத்துக்காக ஒரு கேள்வியைக்கூட சட்டமன்றத்தில் கேட்பார் என்றால் அது உலக அதிசயமாகத்தான் இருக்கும்.

திருமாவளவன் என்ற ஒரு கட்சித் தலைவர் வெல்ல வேண்டும் என்று ஏன் முற்போக்காளர்கள் துடித்தார்கள்? ‘அவரும் அரசியல் குட்டையில் ஊறியவர்தானே? பாரபட்சமே இல்லாமல் எல்லாக் கட்சிகளுடனும் கூட்டணி வைத்துக் கடைசியில் விஜயகாந்த்தைத் தங்கள் கூட்டணியின் முதல்வர் வேட்பாளராக ஏற்றவர்தானே? கட்டப்பஞ்சாயத்து செய்யும் கட்சிதானே அது?’  என்றெல்லாம் அவர்மீது  இந்தத் தோல்விக்கு முன்னும் பின்னும் தொடர்ந்து விமர்சனங்கள், அவதூறுகள் அள்ளிவீசப்படுகின்றன. ஊழலிலும் அதிகாரத்திலும் காலம்காலமாகத் திளைத்தவர்கள் மீது கூட இவ்வளவு குற்றச்சாட்டுகள் சொல்லப்படுவதில்லை. எந்த அதிகாரத்திலும் இல்லாத திருமாவளவன் போன்றவர்கள் மீது மட்டும் இந்தச் சமூகமும் விமர்சகர்களும் இவ்வளவு குற்றம் சுமத்துகிறார்களே என்ற கேள்விக்கு பதில் காண முயன்றால் நம் ஒவ்வொருவருக்குள்ளும் ஊறித் திளைத்திருக்கும் சாதியம் நமக்குப் புலப்படும்.

திராவிடக் கட்சிகளின் கணக்கு

கடந்த ஆண்டு வாக்குப் பதிவு அன்று எங்கள் தெருவில் இருந்த தேமுதிக கட்சிக்காரர் ஓட்டுப் போட்டுவிட்டு இப்படி வந்து சொல்கிறார், ‘தே.மு.தி.கவுக்கு ஓட்டு போட்டிருப்பேன். ஆனால், இவர் (திருமாவளவன்) இந்தக் கூட்டணியில் இருக்கிறார் இல்லையா. மேல்ஜாதிப் பொண்ணுங்களெல்லாம் போய் லவ் பண்ணுங்கன்னு சொன்ன ஆளு இருக்குற கூட்டணிக்கு நான் ஓட்டு போட மாட்டேன்’ என்றார். (திருமாவளவனை ஒருமையில்தான் விளித்தார் என்பதைச் சொல்லத் தேவையில்லை). தன் பையனோ பெண்ணோ பிராமணக் குடும்பத்தைச் சேர்ந்த பையனையோ பெண்ணையோ காதலிப்பார்கள் என்றால் அவருக்கு இந்த அளவுக்குப் பிரச்சினை இருந்திருக்காது. இந்த ஒரு வாக்காளரின் மனநிலைதான் அதிமுக, திமுக என்று கட்சிகள் தொடங்கி ஒட்டுமொத்த சமூகத்திலும் நிலவுகிறது. விசிகவைச் சேர்த்துக்கொண்டால் முக்குலத்தோர் ஓட்டுகள், வன்னியர் ஓட்டுகள் உள்ளிட்ட ஆதிக்க சாதியினர் ஓட்டுகள் தங்களுக்குக் கிடைக்காது என்பது மட்டுமல்ல, அந்தந்த சமூகங்களைச் சேர்ந்த கட்சிகளும் தங்களுடன் கூட்டணி வைத்துக்கொள்ளாது என்பது இருபெரும் திராவிடக் கட்சிகளின் கணக்கு. இத்தனைக்குப் பிறகும் திமுக தோற்றதற்கு சமூகநீதி உணர்வுள்ள கருத்தாளர்கள் கண்ணீர் விட்டுக்கொண்டிருப்பதுதான் வேடிக்கை. ஆரம்ப காலத்தில் வேண்டுமானால் சமூக நீதி என்ற விஷயத்தில் (பெரும்பாலும் பிற்படுத்தப்பட்டோருக்கான சமூக நீதிதான்!) திமுக பங்களிப்பு செய்திருக்கலாம். இப்போதோ அதிமுகவுக்கும் திமுகவுக்கும் எந்த வித்தியாசமும் இல்லை என்ற நிலைக்கு வந்துவிட்டது. கருணாநிதியின் பிடி திமுகவில் தளர்ந்ததன் விளைவாகவும் இதைக் கருதலாம். ‘தி இந்து’வுக்கு திருமாவளவன் அளித்த விரிவான பேட்டியொன்றில் தலித் சமூகத்தின் உரிமைகள், பிரச்சினைகள் குறித்துத் தன்னால் கருணாநிதியிடம் பேச முடிந்திருக்கிறது என்று குறிப்பிட்டிருக்கிறார். ஆனால், அதே திமுகதான் தற்போது திருமாவளவனுக்குப் பாராமுகம் காட்டியிருக்கிறது. சரி திமுக, அதிமுகதான் இப்படி என்றால் மக்கள்நலக் கூட்டணி மட்டும் என்ன லட்சணம். திருமாவளவனை முதல்வர் வேட்பாளராக முன்வைக்கும் துணிச்சல் யாருக்காவது இருந்ததா? தோற்றிருந்தாலும் எவ்வளவு மகத்தான முன்னுதாரணமாக இருந்திருக்கும். 

ஒட்டுமொத்த அரசியலும் வாக்கு வங்கியை நம்பிச் செயல்படுகிறது. அப்படியிருந்தும் தலித் மக்கள் என்ற பெரும் வாக்கு வங்கி யாருக்கும் தேவையில்லை. வாக்கு வங்கி என்ற அளவில் கூட தலித் மக்கள் பொருட்படுத்தப்படுவதில்லை என்பது எவ்வளவு வேதனையான விஷயம். இதில் பொதுச் சமூகத்துக்கு எவ்வளவு பங்கிருக்கிறதோ அதே அளவுக்கு தலித் கட்சிகளுக்கும் இருக்கிறது என்று குற்றம்சாட்டப்படுகிறது. அரசியல் மையநீரோட்டத்தில் கலந்துகொள்ளும்போது மற்றவர்களைப் போலவே தலித் தலைவர்களும் ஊழல்மயப்பட்டுவிடுகிறார்கள் என்று சொல்லப்படுகிறது. இதில் என்ன பிரச்சினை என்றால், அரசியல் மையநீரோட்டம் என்பது முழுக்க முழுக்க பணபலத்தை நம்பி இயங்குவது. சமூகநீதிக்காகப் போராடும் கட்சியொன்று மையநீரோட்டத்தில் கலந்துகொள்ள விரும்பினால் ஊழல்மயப்பட்டாக வேண்டிய கட்டாயத்தை அமைப்பே ஏற்படுத்திவிடுகிறது. பணத்தை நம்பாமல் அரசியலில் ஈடுபடவும் முடியாது. ஆகவே, தலித் கட்சிகளின் பிரச்சினை என்பது புலி வாலைப் பிடித்த கதைதான்.  


II

அதிகாரமின்மையின் இரண்டாயிரம் ஆண்டுகள்…

இரண்டாயிரம் ஆண்டுகளுக்கும் மேலாக அதிகாரத்துக்குத் தொடர்பே இல்லாமல் வாழ்ந்துவருகிறார்கள் தலித் மக்கள் என்று திருமாவளவன் ‘தி இந்து’ பேட்டியில் குறிப்பிட்டிருந்தது பெரும் தவிப்பின் அடையாளம். அப்படியே தலித் சமூகத்தைச் சேர்ந்த ஒருவருக்கு அதிகாரம் கிடைக்கிறது என்றாலும் அதற்கு அவர் எந்த அளவுக்குப் போராட வேண்டும் என்பதற்கு அம்பேத்கரை விட சிறந்த உதாரணத்தைக் காட்ட முடியாது. அவர் காலத்து இந்தியர்கள் யாரை விடவும் அதிகம் படித்திருந்தும், உயர்ந்த பட்டங்களைப் பெற்றிருந்தும், தலித் சமூகத்தில் பிறந்தவர் என்ற ஒரே காரணத்துக்காகப் போகும் இடங்களிலெல்லாம் புறக்கணிப்பை எதிர்கொண்டார். தனது புரவலரின் அலுவலகத்தில் ஆரம்பத்தில் அவருக்கு வேலை கிடைத்தாலும் அங்கும் தனக்குக் கீழ்நிலையில் பணிபுரியும் ஆதிக்கசாதி ஊழியர்களிடமிருந்து கடுமையான சாதிய ஒடுக்குமுறையை எதிர்கொண்டார். அவர் வேலை பார்த்த அலுவலகத்தின் பியூன் கோப்புகளை அம்பேத்கர் மேசைமீது தூக்கித்தான் எறிவார். அலுவலகத்தில் உள்ள தண்ணீர்ப் பானையில் அம்பேத்கர் தண்ணீர் குடிக்கவும் முடியாது.

இன்னும் நெடுக, சமூகத்தினரிடமிருந்தும் அரசியல் வட்டத்திலும் கடும் ஒடுக்குமுறையை எதிர்கொண்டே மேலே மேலே வந்துகொண்டிருந்த அம்பேத்கர் தேர்தல்களில் கூட அதிகம் தோல்விகளையே பெற்றார்.

சுதந்திரத்துக்குப் பிறகு அமைந்த முதல் அமைச்சரவை என்பது உலகத்துக்கே ஓர் முன்னுதாரணம். ‘சுதந்திரம் என்பது காங்கிரஸுக்கு மட்டும் கிடைக்கவில்லை. எல்லோருக்கும்தான்’ என்று சொல்லிய காந்தி, திறமையானவர்கள், தகுதியானவர்கள் காங்கிரஸுக்கு எதிர் அணிகளில் இருந்தாலும் அவர்களையும் அமைச்சரவையில் சேர்த்துக்கொள்ள வேண்டும் என்று வலியுறுத்தினார். காந்தியின் பரிந்துரையைத் தாண்டியும் அம்பேத்கருக்கு நிகரானவர்கள் அப்போது அநேகமாக யாரும் இல்லை என்பதையும் ஒப்புக்கொள்ள வேண்டும்.

அந்த முதல் அமைச்சரவைதான் அப்படிப்பட்ட கடைசி அமைச்சரவையாக அமைந்துபோய்விட்டது என்பது இந்திய ஜனநாயகத்தின் பெருந்துயரம். அதற்குப் பிறகு மறுபடியும் தேர்தல் அரசியலில் அம்பேத்கர் தோற்றுப்போனார். தலித் வேட்பாளர்களுக்கான தனித்தொகுதி இருந்தாலும் பெருங்கட்சிகளைச் சேர்ந்த தலித் வேட்பாளர்களாலோ, பெருங்கட்சியினருடன் கூட்டணி வைத்த தலித் வேட்பாளர்களாலோதான் இந்தத் தேர்தல் அரசியலில் வெல்லவோ தாக்குப்பிடிக்கவோ முடிந்தது. தலித் கட்சிகளாக இருந்தால் அவற்றுக்குப் பொதுச் சமூகத்தின் ஆதரவும் ஓட்டுக்களும் கிடைக்காது. தலித் சமூகத்தினரின் ஓட்டுக்களும் பெருங்கட்சிகளிலுள்ள தலித் வேட்பாளர்களுக்கே பெரும்பாலும் விழும். அந்த வேட்பாளர்கள் தலித்களின் உரிமைகளுக்காக அநேகமாகப் பேசுவதே இல்லை என்பதுதான் நிதர்சனம்.

தலித்களுக்குக் கொடுக்கப்படும் பதவிகள், பொறுப்புகள் பெரும்பாலும் பெயரளவில் அடையாளச் சின்னமாகத்தான் இருக்கின்றன. முன்னாள் குடியரசுத் தலைவர் நாராயணன், பாஜகவின் முன்னாள் தலைவர் பங்காரு லட்சுமணன் போன்றவர்களை அப்படித்தான் பார்க்க வேண்டும். இதையும் தாண்டி, மாயாவதியின் வருகை என்பது இந்திய அரசியலில் ஓர் அதிசயம்தான். பிஹார் முன்னாள் முதல்வர் ஜித்தன் ராம் மாஞ்சிகூட ஒரு வகையில் பொம்மை முதல்வராகத்தான் ஆக்கப்பட்டிருந்தார்.

மாயாவதியின் முக்கியத்துவம்

தலித்கள் அதிகாரத்துக்கு வருவதற்கான அவசியம், முக்கியத்துவம் குறித்துப் பிற சமூகத்தினர் புரிந்துகொள்வது அவ்வளவு எளிதல்ல. மாயாவதியின் மீது மற்ற எல்லோரையும்விட அதிகமாக ஊழல் குற்றச்சாட்டு வைக்கப்படுகிறது. அதில் பெருமளவு உண்மையாகக் கூட இருக்கலாம். ஆனால், உத்தர பிரதேசத்தைச் சேர்ந்த தலித் நண்பர் ஒருவர் சொன்ன செய்தியின் மூலம் மாயாவதி என்ற நிகழ்வின் முக்கியத்துவத்தை நம்மால் புரிந்துகொள்ள முடியும்.  “தலித் முதல்வர் என்பதெல்லாம் சரிதான். ஆனால், இந்த அளவுக்கு ஊழல்வாதியாக இருக்கிறாரே மாயவாதி, அவரை எப்படி நாம் ஏற்றுக்கொள்வது?” என்ற கேள்விக்கு அவர் இப்படிப் பதில் அளித்தார்: “நீங்கள் சொல்வது உண்மைதான். ஆனால், ஒரு விஷயத்தை நீங்கள் பார்க்க வேண்டும். மாயாவதி முதல்வராக ஆவதற்கு முன் ஒரு தலித் ஏதாவது புகார் கொடுக்கக் காவல் நிலையம் சென்றால், ‘ஓ, காவல் நிலையம் வந்து புகாரெல்லாம் கொடுக்கும் அளவுக்கு வந்துவிட்டாயா?’ என்று கேட்டுக் கைகால்களை முறித்துவிட்டுத்தான் அனுப்புவார்கள். மாயாவதி முதல்வரான பின்புதான் தலித்கள் புகார் கொடுக்க வந்தால் மதித்து உட்காரச் சொன்னார்கள். தலித் உரிமைகளைப் பொறுத்தவரை இது எவ்வளவு பெரிய பாய்ச்சல் என்பதைப் புரிந்துகொண்டால்தான் உங்களால் மாயாவதியின் முக்கியத்துவத்தைப் புரிந்துகொள்ள முடியும்” என்றார். திருமாவளவன் மீது யார் வேண்டுமானாலும் என்ன வேண்டுமானாலும் குற்றச்சாட்டுகள் வைக்கட்டும்; அவர்களுக்கும் சேர்த்துதான் அந்த உத்தர பிரதேசத்துக்காரர் பதில் சொல்லியிருக்கிறார்.


III

எந்த பாதை நோக்கி?

தலித் மக்கள் காலம்காலமாக அனுபவித்துவரும் கொடுமைகளுக்குத் தீர்வு  என்பது அவர்கள் அதிகாரத்துக்கு வருவதுதான். ஆனால், அதிகாரத்தை நோக்கி மற்றவர்கள் சென்ற பாதையிலேயே அவர்களும் கட்டாயம் காரணமாகச் செல்ல முயன்றுகொண்டிருப்பதும், சமூகத்தின் புரையோடிய சாதிய உணர்வும்தான் தலித்களின் அதிகாரப் பாதை நோக்கிய பயணத்தை சமூகத்தால் ஏற்றுக்கொள்ள முடியாமல் போனதற்குக் காரணங்கள். பொதுச் சமூகத்தின் பொதுப்புத்தியை மாற்றாமல் தலித்களால் அதிகாரத்தை அடையவே முடியாது. இதற்கு அரசியல் அதிகாரத்துக்கான முயற்சிகள் மட்டுமே போதாது. ஏனெனில், அந்த முயற்சிகளை அடையும் வழியை வழக்கமான ஊழல் பாதையாகவே அமைப்பு போட்டு வைத்திருக்கிறது. ஊழலை விட சாதியம் எவ்வளவு மோசமானது, இந்தியாவின் தலையாய பிரச்சினை சாதிதான் என்பதை தலித் மக்களும் முற்போக்காளர்களும் சொல்லிவந்தாலும் பொதுச் சமூகத்தின் பொதுப் புத்தியில் ஊழல்தான் பிரதானப் பிரச்சினையாகத் தோன்றும். (வெளித்தோற்றத்துக்காகவாவது) ஊழலற்ற மனிதர்களால், ஊழலற்ற அமைப்புகளால் முன்னெடுக்கப்படும் போராட்டங்களே பொது மக்களிடையே பெரும் வரவேற்பைப் பெறுகின்றன. ஆகவே, ஒரு பக்கம் அரசியல் பாதையை நோக்கிய பயணம் இருக்க, இன்னொரு பக்கம் தலித் மக்களிடையே இயங்கி, பொதுச் சமூகத்துக்கும் தலித் மக்களுக்கும் இடையிலான உரையாடலை, உறவை மேம்படுத்தி, அரசியலின் ஊழலுக்கு அப்பால் இயங்கும் தலித் அமைப்புகள் ஆகிய இரண்டு தரப்புகளும் அவசியமகின்றன.

காந்தியின் காலத்தில் ஆதிக்கசாதியினரிடையே அவர்களது மனசாட்சியைத் தட்டியெழுப்ப அவர் பணியாற்றியதுபோல் இன்று யாரும் செய்யக் காணோம். இரு தரப்பும் பிளவுபட்டு, உரையாடலும் உறவும் சாத்தியமற்ற சூழல் காணப்படுகிறது. தலித் அமைப்புகள்-கட்சிகள், இடதுசாரிகள், பெரியாரியர்கள், திராவிடக் கட்சிகள், காந்தியர்கள் போன்றோர் தங்கள் கருத்துவேறுபாடுகளைத் தூரத்தில் வைத்துவிட்டு சாதியொழிப்பை நோக்கியும் தலித் மக்கள் உள்ளிட்ட நசுக்கப்பட்ட மக்கள் அதிகாரம் பெறுவதை நோக்கியும் ஒருங்கிணைந்து செயல்பட்டால் நிச்சயம் பெருமளவிலான மாற்றம் ஏற்படும். ஆனால், இங்கே தலித் அமைப்புகள், தலித் தலைவர்கள் காந்தியையும் காந்தியவாதிகளையும் அடியோடு வெறுக்கின்றனர். பெரியார் மீதும் கணிசமானோருக்கு விமர்சனம் உண்டு. இடதுசாரிகள் மீதும் முழு நம்பிக்கை இல்லை. இது ஒரு பக்கம் என்றால், காந்தியவாதிகளுக்கு அம்பேத்கர் ஒரு பொருட்டல்ல (காந்தி அப்படிக் கருதியவரல்ல), பெரியாரியர்கள் பலரும் பிராமணியத்துக்கு எதிராகவும், பிற்படுத்தப்பட்டோர் நலனுக்காகவும் போராடிய அளவுக்கு தலித் மக்களின் உரிமைகளுக்காகப் போராடவில்லை என்று குற்றம்சாட்டப்படுகிறது. கீழ்வெண்மணி போன்ற பிரச்சினைகளில் தலித் மக்களுடன் நின்றவர்கள் இடதுசாரிகள். ஆனால், அவர்களில் பலரும் சாதியத்தை வர்க்கப் பிரச்சினையாக பார்க்கும் மனநிலையைத் தாண்டி வரவில்லை. இப்படி இரு தரப்பிலும் காணப்படும் வேறுபாடுகளால், பிளவுகளால் இழப்பென்பது தலித் மக்களுக்கும், லாபம் என்பது சாதியவாதிகளுக்குமாகத்தான் இருக்கிறது. இந்தப் பிளவு மேலும் மேலும் மோசமாகிக்கொண்டுதான் போகிறது. அதிகாரத்தை நோக்கிய தலித் மக்களின் பயணம் இதனால் அடைந்திருக்கும் பின்னடைவை முற்போக்காளர்கள் அனைவரும் ஆழமான அகவிசாரணைக்கு உட்படுத்த வேண்டும்.

பொது மனசாட்சியைக் குறிவைத்து…

ஜனநாயகத்துக்குத் தேர்தல் எவ்வளவு அவசியமாக இருந்தாலும் தேர்தலுக்கு ஜனநாயகம் பொருட்டல்ல என்பதுதான் அம்பேத்கரில் ஆரம்பித்து திருமாவளவன் வரையிலானோரின் தோல்விகள் நமக்கு உணர்த்தும் உண்மை. அந்த அளவுக்கு சாதியத்துக்குள் பொதிந்துவைக்கப்பட்டிருக்கிறது நம் சமூகம். மற்றவர்களெல்லாம் கோபம் வந்தால் வன்முறையில் இறங்கலாம், கலவரத்தில் ஈடுபடலாம். ஒரு தலித் அப்படிச் செய்ய முடியாது. எதிர்க்க நினைத்தாலும் பாதிப்பு அவருக்குத்தான். அவர் ஒரு அடி கொடுத்தால் அவர் சமூகம் முழுமைக்கும் பல அடிகள் திருப்பி விழும். ‘அம்பேத்கர் நினைத்திருந்தால் நம்மீது வன்முறையைப் பிரயோகித்திருக்கலாம். அதற்குரிய எல்லா நியாயமும் அவருக்கு இருந்தது. ஆனால், அவர் அப்படிச் செய்யவில்லை. அவர் நம்மீது காறித் துப்பினாலும் அதை நாம் ஏற்றுக்கொள்ள வேண்டும்’ என்று காந்தி கூறினார். தலித்கள் என்னவோ அகிம்சையை விரும்பித் தேர்ந்தெடுத்ததுபோல் நமக்குத் தோற்றமளித்தாலும் உண்மை என்னவென்றால் அவர்கள் திருப்பி அடிக்க முடியாதவாறு, அப்படிச் செய்தால் அவர்களுக்கே பாதிப்பு ஏற்படும்விதத்தில் இந்தச் சாதியச் சமூகம் அவர்களைச் சூழ்ந்துகொண்டிருக்கிறது. அதுதான் யதார்த்தம்! தலித்கள் அகிம்சையை மேற்கொண்டிருப்பது இருக்கட்டும், இந்தச் சமூகம் எப்போது அகிம்சைக்குத் திரும்பப் போகிறது என்ற கேள்விக்குப் பதில் காண வேண்டுமானால், தலித்களின் அதிகாரத்தை நோக்கிய பயணம் முன்திசையில் செல்ல வேண்டுமானால் பிளவுகளைக் கடந்த உரையாடலும் உறவாடலும் பொது மனசாட்சியைக் குறிவைக்கும் முயற்சிகளும் நடைபெற்றால் மட்டுமே சாத்தியம்! இது ஒரு கை ஓசையாக இல்லாமல் அனைத்துத் தரப்பினரும் பங்கேற்கும் கரகோஷமாக ஆக வேண்டும். ஒற்றுமையாய்க் கைகோத்துக்கொண்ட சாதியப் பெருமிதங்களை உள்வாங்கிக்கொண்டு பிரம்மாண்டமாய் இந்துத்துவம் எழுச்சி பெற்றிருக்கும் இந்தக் காலத்தில் முற்போக்காளர்கள் மட்டும் சிதறிக் கிடப்பது இந்தக் கனவைக் கனவாகவே வைத்திருக்கும் என்பதை எல்லோரும் உணர வேண்டும்.

 (2017-ல் வெளியான கட்டுரை)

Tuesday, August 15, 2023

எல்லோருக்குமாம் ஒரு இன்னறுங் கனிமரம்


 

சிறுவயதில்
தெருவில் கொடியேற்றம்
அப்பாவிடம் கேட்டேன்
இது என்ன மரமென்று
கொடிமரம்டி என் தங்கம்
என்றார்
கொடிமரம் என்றால்
பூ பூக்குமா
காய் காய்க்குமா
பழம் பழுக்குமா
என்று கேட்டேன்
கண்டிப்பாய் என்றார்
நான் பறித்துக்கொள்ளலாமா
என்று கேட்டேன்
எல்லோரும் பறித்துக்கொள்ள வேண்டுமென்றுதான் ஊர்ப்பொதுவில் நட்ட மரம்
நான் பிறந்தபோது இல்லை
உனக்கு இருக்கிறது
எவ்வளவு தாத்தா
எவ்வளவு ஆத்தா
இதை நடுவதற்குப்
படாதபாடு பட்டிருக்கிறார்கள் தெரியுமா
என்றார்
ஒரு மரம் நடுவது என்ன
அவ்வளவு பெரிய சிரமமா அப்பா
என்று கேட்டதற்கு
ஆமாம்
மரநிழலில் இளைப்பாறக்கூட
முடியாது என்றபோது
நம் ஒவ்வொருவரும்
சொந்தமாய் நட்டுக்கொள்ள
ஒரு மரம் தந்தார்களே சும்மாவா
மரம் நடுவது சிரமம்தான்
அதைவிடச் சிரமம்
நட்டமரம்
பட்டுப்போகாமல் பார்த்துக்கொள்வது
அப்போதுதான்
மரம் உனக்குக் கனி தரும்
உனக்கான கனி
எல்லோருக்கும் இனிக்கும்
என்று சொல்லிவிட்டுக் கேட்டார்
உனக்கான கனியை
எல்லோருக்கும் இனிக்கச் செய்வாயா
அப்பா பேசியதும் புரியவில்லை
அதற்கு என்ன பதில் சொல்வதென்றும்
தெரியவில்லை
பேசியது மட்டும்
அழியாமல் நினைவில் இருக்கிறது
அதே மரத்திலிருந்து பறித்து
எல்லோருக்கும் கசப்பின் கனிகள்
வழங்கப்பட்டுக்கொண்டிருக்கும் இன்று
என் வீட்டின் நடுவே
நட்டுவைத்திருக்கிறேன்
அப்பாவின் கேள்வியை
கசப்பிடம் தோற்ற
என் இனிப்பை
என் பிள்ளைகள்
வெல்லச் செய்வார்கள்
- ஆசை
15-08-23


தொப்புள்கொடி

 


ஏற்றுவதற்காகச்
சிந்தப்பட்ட
எவ்வளவோ குருதியும்
கண்ணீரும்
வியர்வையும்
இரண்டு கைகளாய்
உருத்திரண்டு
ஏற்றப்பட்ட
கொடி

எல்லா கண்ணீரையும்
காயங்களை
ஆற்றவே
அது அசைந்தாடி
காற்று வீச வேண்டுமென
ஏற்றிய கொடி

அண்ணாந்து பார்க்கும்
எல்லா விழிகளுக்கும்
வானத்தையே வாழ்வாகத்
தரும் கொடி

அது அசைக்கும்
காற்று
அதன் கீழுள்ள
எல்லா உயிர்களையும்
ஒரு தளையின்றி
அந்த வானில் பறக்க விடும்
கொடி

தாயின் மணிக்கொடி
சுதந்திர வாழ்வின்
தொப்புள் கொடி

கண்களைக் கட்டிப்போட்டு
ஏற்றினாலும்
உயிர் உணரும் கொடி
உயிர் மூச்சு தரும் கொடி
உயிர் மேல் ஏற்றிய கொடி

அது உயிர்மேல் 
அசைந்தாடிப் பறக்கட்டும் என்றும்
உயிருள்ள கைகள் மட்டுமே
ஏற்றட்டும் என்றும்
     -ஆசை

Friday, August 11, 2023

அனிருத்தின் புள்ளீங்கோ



நினைவுகளின்
கனிரசம் பிழிந்து
மொண்டுமொண்டு
நீங்கள் குடித்துக்கொண்டிருக்கிறீர்கள்

அதிகாலையை வரவேற்க ஒரு பாடல்
இரவின் தூக்கத்துக்காக ஒரு பாடல்
காதலியின் நினைவு வந்தால் ஒரு பாடல்
அம்மா ஏக்கத்துக்கு ஒரு பாடல்
என்றெல்லாம் திளைத்துக் கிடந்த
உங்களை
இழுத்துக்கொண்டு வந்து
அனிருத்திடம் சரணடைய வைக்கிறார்கள்
அடம்பிடித்து
ஆடவும் வைக்கிறார்கள்

டோராவின் புச்சியாக்கி
உங்களை பியானோ பாலத்தில்
நடக்க வைக்கிறார்கள்

ஸ்பைடர்மேன்பூச்சியாகி
உங்கள் கையில் செல்லக்கடி கடித்து
உங்களை ஸ்பைடர்மேன் ஆக்குகிறார்கள்

தோர்  சுத்தியலைக் கையில் கொடுத்து
பலங்கொண்ட மட்டும்
சுழற்றியெறியச் சொல்கிறார்கள்

அதுபோய் விழுந்து
உங்கள் நினைவின் கனிரசம்
தெறித்தெழுந்து
விண்ணில் போய் ஒட்டிக்கொண்டுவிடுகிறது
நட்சத்திரங்களாய்

அவற்றை நிமிர்ந்து பார்த்து விடாதீர்கள்
ஆடும் கால்களுக்குச்
சிலைவைத்துவிடுவார்கள்

உங்கள் பிள்ளைகள்
வேறு யாருமல்ல
விபத்துக்குள்ளாகிச் சிதிலமானதால்
வேர்க்க விறுவிறுக்க
நீங்கள் இழுத்துவரும் வண்டியின்
கயிற்றைத் துண்டிக்க வந்தவர்கள்

துண்டிக்கப்பட்டபின்
நீங்கள் உணர்வீர்கள்
இழுக்க ஏதுமில்லை என்றால்
பறக்கத்தான் எல்லாம் என்று

உங்கள் பிள்ளைகள்
உங்களூடாக வந்தவர்கள் மட்டுமல்ல
உங்களைப் புள்ளீங்கோ
ஆக்க வந்தவர்களும் கூட

கொஞ்சம் ஆகித்தான் பாருங்களேன்
       - ஆசை
      26-04-23
      நன்றி: கலீல் ஜிப்ரான்

Wednesday, July 5, 2023

நாளை காப்பாற்றலாம்

 

Desperation by Eduardo Rodrigues


மனம் சிதறுண்டு
ஒருவன்
உட்கார்ந்திருக்கிறான்
அவன்
தனது கழிவிரக்கத்தைச்
சிற்பமாகச் செய்து
வேடிக்கை பார்த்துக் கொண்டிருக்கவில்லை
சிதறலின் இடைவெளிக்கு அப்பால்
கொஞ்சமே கொஞ்சம் தெரியும்
மிச்ச வாழ்க்கை
தன்னைப் போல் இருக்கிறதா
என்று பார்த்துக்கொண்டே
இருக்கிறான்
உங்களுக்கு அவன்
தன் சிதறலுக்கு
மாடலாய்
உட்கார்ந்திருப்பதாகத்
தோன்றலாம்
இந்தக் கிறுக்குத்தனத்திலிருந்து
எப்படியாவது
அவனைக் காப்பாற்ற வேண்டும்
என்று நீங்கள் துடிதுடிக்கலாம்
உங்களிடம்
அவனைக் காப்பாற்றுவதற்கான
எல்லா உபாயங்களும்
ஆயுதங்களும்
கருவிகளும்
இருக்கலாம்
இது அவனுக்கும்
பரிபூரணமாகத் தெரியும்
ஆனால்
உங்கள் அன்பையும் அக்கறையையும்
சிதறல்களை ஒட்டும் பசையையும்
சிதறலின் வேர்களைக்
கண்டுபிடிக்கும் கருவிகளையும்
நாளைக்குக் கொண்டுவாருங்கள் என்றும்
வெளியேறும் வெற்றிடத்தின்
ஓசையை
சிறிது நேரம்
கேட்டுக்கொண்டிருக்க மட்டும்
அவனை அனுமதியுங்கள்
என்றும்
அவன் சொல்லத் தெரியாமல்தான்
உங்கள் முன் சீறி வெடிக்கிறான்
என்பதை
தயவுசெய்து புரிந்துகொள்ளுங்கள்
அவனை
நாளையோ
நாளை மறுதினமோ
நிச்சயம்
நீங்கள் காப்பாற்றிவிடுவீர்கள்
-ஆசை

Friday, June 30, 2023

நெஞ்சை விரித்த பலூன்களே

 


வெறுப்பு
கோபம்
பொறாமை
எரிச்சல்
கழிவிரக்கம்
ஏக்கம்
எல்லாம்
ஏராளம் உண்டு
என்னிடம்

ஒவ்வொன்றும்
முடிச்சிட்டுக்கொண்டே
உள்ளுக்குள்
விரியும் பலூன் என்று
உணர்ந்தபோது
அவையெல்லாம்
ஒன்றுக்கொன்று மோதிக்கொண்டு
நெஞ்சை நெஞ்சை
முட்டித்தள்ளின

நெஞ்சு வெடிக்க
ஒரு நொடி என்றபோதே
உணர்ந்தேன்
பலூன்களின் இடம்
எதுவென்று

எடுத்து
ஒவ்வொன்றாய்
வெளியே பறக்க விட்டபோதுதான்
உணர்ந்தேன்
பலூன்கள் எவ்வளவு
அழகு என்று

அப்போதுதான் உணர்ந்தேன்
நெஞ்சுக்குள்
எவ்வளவு இடம்
இருந்திருக்கிறது
என்று

நெஞ்சை விரித்த பலூன்களே
மறுபடியும்
உள்ளே வந்துவிடாமல்
பார்வையிலிருந்தும்
தொலைந்துவிடாமல்
அங்கேயே பறந்துகொண்டிருங்கள்
எப்போதும்
            - ஆசை

Thursday, June 29, 2023

அல்-ஃபட்டாஹ்

 


எல்லா மகத்துவத்தையும்
விஞ்சி நிற்கிறது
உன் மகத்துவம்

எல்லா அணுத்துவத்தையும்
சென்று நிறைப்பதே
உன் மகத்துவம்

அணுத்துவம் திறக்க
மகத்துவம்
ஒன்றே சாவி

மகத்துவம் திறக்க
உன் பேரருளே
சாவி

பிறப்பிலிருந்து
திறப்புக்கும்
திறப்பிலிருந்து
பெருந்திறப்புக்கும்
இட்டுச்செல்லும் நீரே
பெருந்திறப்பாளர்
            -ஆசை

(அல்லாவுக்கு  99 திருப்பெயர்கள் வழங்கப்படுகின்றன. ஒவ்வொரு பெயரும் பேரழகு மிக்க கவிதை. அல்லாவுக்கு நூறாவது பெயரும் ஒன்று உண்டு என்ற புனைவை அடிப்படையாகக் கொண்டு அமீன் மாலூஃப் 'Balthasar's Odyssey' என்ற நாவலை பிரெஞ்சில் எழுதியிருக்கிறார். அல்லாவின் ஒவ்வொரு திருப்பெயரும் 'தோள் கண்டார் தோளே கண்டார்' என்று தன்னைத் தாண்டிச் செல்ல விடாது. எனக்கு அல்-ஃபட்டாஹ் (Al-Fatah) அப்படி.  அல்-ஃபட்டாஹ் என்றால் திறப்பாளர் என்று பொருள்.) 

Tuesday, June 27, 2023

சூரியன் எதைச் சுற்றுகிறது?

ஓவியம்: வான் கா


ஆசை

சமகாலத்தின் மிக முக்கியமான இயக்குநர்களில் ஒருவரான பெலா டார் எடுத்த அற்புதமான திரைப்படம் ‘வெர்க்மைஸ்டர் ஹார்மனீஸ்’. இதன் தொடக்கக் காட்சி ஒரு மது விடுதியில் இடம்பெற்றிருக்கிறது.

 படத்தின் இளம் நாயகனான யானோஸ் வலுஸ்கா தனது மூன்று நண்பர்களை வைத்து சூரியன், பூமி, நிலவு நடனத்தை நிகழ்த்துவார். சூரியன் போன்று ஒருவர் நடுவில் நிற்க இன்னொருவர் பூமியின் வேடத்தில் தன்னைத் தானே சுற்றிக்கொண்டு சூரியனையும் சுற்றுவார். பூமியை நிலவு பாத்திரத்தில் ஒருவர் தன்னைத் தானே சுற்றிக்கொண்டு பூமியைச் சுற்றுவார். ஆக, நிலவு மனிதர் ஒரே நேரத்தில் பூமியையும் சூரியனையும் சுற்றுவார். இந்த அறிவியல் விளக்கம் ஒரு அற்புதமான நடனம்போல் படத்தில் அமைக்கப்பட்டிருக்கும். இந்தக் காட்சியைப் பார்த்துக்கொண்டிருந்தபோது அருகிலிருந்த என் நண்பர் கேட்டார், “சூரியன் பாத்திரத்தை ஏற்றவர் நபர் அப்படியே இருக்கிறாரே. உண்மையில் சூரியன் அசையாமல் இருக்கிறதா, அல்லது சுற்றுகிறதா?”

கொஞ்சம் தலைசுற்றவைக்கும் கேள்விதான்! நாம் எல்லோரும் தோற்றத்தை நம்பி வாழ்பவர்கள்; எதையாவது பற்றிப் புகார் கூறினால், “நீ கண்ணால் பார்த்தியா?” என்று கேள்வி கேட்பவர்கள். ஆனால், கண்ணால் பார்ப்பதுவும் முழு உண்மையாக இருக்காது என்பதற்கு பூமி, சூரியனின் சுழற்சிகளையும்கூட நாம் சான்றாக எடுத்துக்கொள்ளலாம்.

வெகு காலம் வரை சூரியன்தான் பூமியைச் சுற்றிவருகிறது என்று மனிதர்கள் நம்பினார்கள். போலந்தைச் சேர்ந்த கோப்பர்நிக்கஸ் என்ற அறிவியலாளர்தான் ‘பூமியைச் சூரியன் சுற்றவில்லை. பூமிதான் சூரியனைச் சுற்றிவருகிறது’ என்ற கோட்பாட்டுக்கு 16-ம் நூற்றாண்டில் அடியெடுத்துக்கொடுத்தார். பேருந்தில் ஜன்னலோரம் அமர்ந்திருக்கும் குழந்தை சாலையோரம் உள்ள மரங்கள்தான் ஓடுகின்றன என்றும், பேருந்து அப்படியே இருக்கிறது என்றும் நம்புவதைப் போல அதுவரை மனிதர்கள் ‘சூரியன்தான் பூமியைச் சுற்றிவருகிறது’ என்று நம்பிக்கொண்டிருந்தார்கள்.

‘சூரியனைத்தான் பூமி சுற்றுகிறது’ என்ற கருத்து கடந்த நான்கு நூற்றாண்டுகளாக நன்றாக நிறுவப்பட்டுவிட்டது. ஆனால், ‘சூரியனும் சுற்றுகிறதா, அப்படியென்றால் எதைச் சுற்றுகிறது?’ என்ற விஷயம் மட்டும் அறிவியலாளர்களைத் தாண்டிப் பொதுமக்களுக்கு இன்னமும் அறிமுகமாகாத ரகசியமாகவே உள்ளது. இன்னும் சொல்லப்போனால் இந்தக் கேள்வியே பெரும்பாலானோருக்கும் எழுவதில்லை. ‘சூரியன் எதைச் சுற்றினால் என்ன, நமக்குக் காலையில் பொழுது விடிந்தால் போதும்’ என்ற சராசரியான மனநிலைதான் இந்த அறியாமைக்குக் காரணம்.

சூரியன் மட்டுமல்ல இந்தப் பிரபஞ்சத்தில் அணுவின் உட்கருவில் தொடங்கி விண்மீன் மண்டலங்கள் (Galaxies) வரை சுற்றாத பொருளென்று ஏதும் இல்லை. அசைவு என்பது அனைத்துக்கும் அடிப்படை.

‘சரி, சூரிய குடும்பத்தில் உள்ள எல்லா கோள்களும் சூரியனைச் சுற்றுகின்றன; அதைப் போல சூரியன் எதைச் சுற்றுகிறது?’ என்று கேட்க வருகிறீர்களா? முதலில் சூரிய குடும்பத்தில் உள்ள எல்லாக் கோள்களும் சூரியனைச் சுற்றுகின்றன என்பது உண்மையல்ல. நம் குடும்பத்தில் உள்ள எல்லாக் கோள்களும் சூரியனை மையமாகக் கொண்டு சுற்றினால் வியாழன் மட்டும் சூரியனுக்குச் சற்று அருகில் உள்ள ஒரு புள்ளியை மையமாகக் கொண்டு சுற்றுகிறது. மிகப் பெரிய கோளாக இருப்பதால் இப்படி ஒரு விசித்திர அமைப்பு.

இப்போது சூரியனுக்கு வருவோம். நமது சூரியன் ‘பால்வீதி’ எனும் விண்மீன் மண்டலத்தில் ஒரு அங்கம். இந்தப் பால்வீதி சுமார் 2 லட்சம் ஒளியாண்டுகள் விட்டம் கொண்டது. (ஒளி ஒரு ஆண்டுக்குப் பயணிக்கக்கூடிய தொலைவுதான் ஒரு ஒளியாண்டு. அதாவது 9,50,000,00,00,000 கி.மீ. இத்துடன் 2 லட்சத்தைப் பெருக்கினால் பால்வீதியின் விட்டம்). அதில் சற்றே வெளிப்புறத்தில் நமது சூரியன் அமைந்திருக்கிறது. பால்வீதியின் மையத்தில் இருக்கும் மிகப் பெரிய கருந்துளையைத்தான் சூரியன் சுற்றிவருகிறது. ஒரு முழுச் சுற்றுக்கு ஆகும் காலம் சுமார் 22-லிருந்து 25 கோடி ஆண்டுகள்.

அப்படியென்றால் சூரியன் இதுவரை எத்தனை முறை பால்வீதியின் மையத்தைச் சுற்றியிருக்கும்? ஒரு கணக்குப் போட்டுப் பாருங்களேன். பூமியின் வயது சுமார் 450 கோடி ஆண்டுகள். அப்படியென்றால் சூரியனை பூமி 450 கோடி முறை சுற்றிவந்திருக்கிறது என்று அர்த்தம். அதேபோல் சூரியனுக்குக் கணக்கிட்டுப் பார்ப்போமா? சூரியனின் வயது 460 கோடி ஆண்டுகள். பால்வீதியின் மையத்தை ஒருமுறை சுற்றிவர சூரியன் எடுத்துக்கொள்ளும் காலம் சுமார் 22-25 கோடி ஆண்டுகள். ஆக, தன் ஆயுளில் இதுவரை 19 முறைதான் சூரியன் பால்வீதியைச் சுற்றிவந்திருக்கிறது. சூரியனோடு சேர்ந்து பூமியும் கிட்டத்தட்ட 19 முறை பால்வீதியைச் சுற்றிவந்திருக்கிறது என்றும் சொல்லலாம்.

சூரியன் எவ்வளவு வேகத்தில் தன் சூறாவளி ‘சுற்று’லாவை மேற்கொண்டிருக்கிறது என்பது தெரிந்தால் மலைத்துப்போவீர்கள். மணிக்கு 8,28,000 கி.மீ. வேகம்! இந்த வேகத்தில் பூமியின் நிலநடுக்கோடு வழியாக ஒரு வாகனத்தில் (இந்த வேகத்தில் செல்லும் வாகனம் ஏதும் பூமியில் இல்லை என்றாலும்) நீங்கள் புறப்பட்டால் 2 நிமிடங்கள் 54 நொடிகளில் பூமியை ஒரு முறை சுற்றிவிட்டுப் புறப்பட்ட இடத்துக்கே வந்து சேர்வீர்கள்.

‘சூரியன் சுற்றுகிறது என்பதை ஒப்புக்கொள்கிறோம்; பால்வீதியும் சுற்றுகிறதா?’ என்று நீங்கள் கேட்பது என் காதில் விழாமல் இல்லை. ஆம், சுற்றுகிறதுதான்.

பால்வீதி மண்டலமும் அதற்கு அருகில் உள்ள ஆண்ட்ரோமிடா விண்மீன் மண்டலமும் தங்களுக்கு இடையே உள்ள ஒரு புள்ளியை மையமாகக் கொண்டு சுற்றுகின்றன. இடையே உள்ள புள்ளி என்றால் கருந்துளையையோ இன்னொரு விண்மீன் மண்டலத்தையோ அல்ல. இடையில் உள்ள ஒரு குறிப்பிட்ட இடத்தைதான். குழப்புகிறதா? இரண்டு சிறுமிகள் ஒருவரையொருவர் கையைக் கோத்துக்கொண்டு தட்டாமாலை சுற்றுவதைப் பார்த்திருக்கிறீர்களா? அதைப் போலத்தான். என்ன, இந்த மண்டலங்களுக்குக் கைகள் கிடையாது. இரண்டும் ஏறக்குறைய சம அளவிலான நிறை கொண்டவை என்பதால், ஒன்றுக்கொன்று சம அளவு ஈர்ப்புவிசையைச் செலுத்துவதால் அவை இரண்டுக்கும் இடையிலான ஒரு புள்ளியை மையம் கொண்டு சுற்றுகின்றன. இப்படிச் சுற்றிக்கொண்டே சுமார் 300 அல்லது 400 கோடி ஆண்டுகளில் ஒன்றுடன் ஒன்று மோதிக் கலக்கும். பயப்பட வேண்டாம். விண்மீன் மண்டலங்களில் பொருட்களைவிட இடைவெளிதான் மிக அதிகம் என்பதால் நமது சூரியக் குடும்பம் இந்த மோதலில் தப்பிப் பிழைக்கவே பெரும் வாய்ப்பு இருக்கிறது.

பால்வீதியும் ஆண்ட்ரோமிடா மண்டலமும் அமைந்திருக்கக்கூடிய பிரபஞ்சப் பகுதிக்கு ‘அருகமை குழு’ (Local group) என்று பெயர். அது ‘விர்கோ பெரும்கொத்து’ (Virgo Supercluster) எனும் பிரம்மாண்டத்தைச் சுற்றிவருகிறது. ‘விர்கோ பெரும்கொத்து’ அதனை விட பிரம்மாண்டமான இன்னொன்றைச் சுற்றிவரக்கூடும். இப்படிப் பெரிதாக்கிக்கொண்டே போனால் இறுதியில் பிரபஞ்சம்தான்.

அப்படியென்றால் பிரபஞ்சம் எதைச் சுற்றுகிறது என்று கேட்கத் தோன்றுகிறதல்லவா? கேட்டால் தப்பில்லை. இப்படி அசாதாரண விஷயங்களைப் பற்றிய கேள்விகள்தான் நமது  அறிவை விரிவாக்கிக்கொண்டே இருக்கின்றன. உங்கள் கேள்விக்கு பதில் இப்போது. சுற்றுவது என்பது ஒன்றுக்கும் மேற்பட்ட பொருள்களுக்கிடையிலான, ஒன்றையொன்று சார்ந்த செயல். பிரபஞ்சத்தில் எண்ணற்ற கோள்களும் விண்மீன்களும் விண்மீன் மண்டலங்களும் பெருங்கொத்துகள் இருக்கின்றன. அதனால் சிறியது பெரியதைச் சுற்றிவருகிறது. ஆனால், பிரபஞ்சம் என்பது நமக்குத் தெரிந்தவரை ஒன்றுதானே இருக்கிறது. பிரபஞ்சத்துக்கு வெளியில் எதுவும் இல்லை என்பதால் பிரபஞ்சம் வேறு எதையும் சுற்றவில்லை என்று கூறலாம். சுற்றவில்லையே தவிர, பிரபஞ்சம் அசையாமல் அப்படியே இருக்கவுமில்லை. ஒரு நொடிக்கு 68 கி.மீ. வேகத்தில் இந்தப் பிரபஞ்சம் விரிவடைந்துகொண்டிருக்கிறது. ஆக, பாரதியாரைப் போல் சொல்ல வேண்டுமென்றால் ‘அசையாத பொருளில்லை இந்த இந்த அவனியிலே’!

Thursday, June 22, 2023

தம்பி ஒரு மீம் குழந்தை



அண்ணன்காரன் வாட்ஸப் மீம்களைத் தம்பிக்குப் படித்துக் காட்டிவிட்டு அவன் முகம் பார்க்கிறான் தம்பி அண்ணன் முகம் பார்க்கிறான்
மறுபடியும் மீம்களைப் படித்துக் காட்டுகிறான்
தம்பியோ கல்மாதிரி
வெறிக்கிறான்
தம்பியை எப்படியோ
சிரிக்க வைக்க வேண்டும்
என்ற முயற்சியில்
இறங்குகிறான்
முழுவெறியில்
இன்னும் இன்னும்
குழந்தைக்கு
எளிதாய்ப் புரியும்படியாய்
மீம்கள் படித்துக் காட்டுகிறான்
அண்ணன்
தம்பியோ கதை கேட்பது போல்
உம் கொட்டுகிறான்
'பாரும்மா
எவ்வளவு ஜோக்கு
படிச்சாலும் சிரிக்க மாட்டேங்கிறான்
சரியான முட்டாளைப்
பெத்திருக்கியே
இவனைப் பேசாம
வித்துரும்மா'
என்று கடும் விரக்தியில்
கைபேசியை மெத்தையில்
தூக்கிப் போடுகிறான்
அம்மா
எடுக்கிறாள் அதை
குழந்தையை ஒரு கையால்
அணைத்தபடி
மீம்களை மனதுக்குள்
படித்துவிட்டு
வெடித்துச்
சிரிக்கிறாள்
குழந்தையோ
குலுங்கிச் சிரிக்கிறான்
அண்ணனோ
கடுப்பில் முறைக்கிறான்

- ஆசை 

Wednesday, June 21, 2023

ஒளியான சொல்


சொற்களெல்லாம்

இடைவிடாமல்

பொருள் குறித்துக் கொண்டிருக்க

பொருளெல்லாம்

இடைவிடாமல்

நோய்ப்புற்றாய்க் கிளைத்துக்கொண்டிருக்க

பொருளறியப் புலனெல்லாம்

கிளைதோறும்

தலைதெறிக்க ஓடிக்கொண்டிருக்க

பொருள்வெடிப்பின்

ஒருமைநிலை

எட்டிவிட


சாபமிட்டேன்


எல்லாச் சொல்லும் 

பொருள் குறிக்காமல்

போகுக


இட்டது கேட்டேன்

விட்டது அறிந்தேன்


வெறிச் 

என்ற சொல்லும்

வெறிச்சோடியதுபோல்

ஆனது உலகு


அப்போது

மேகத்தைக் கடல் நீர்

வேடிக்கை பார்ப்பது போல்

சொற்களை

அண்ணாந்து வேடிக்கை பார்க்க

ஆரம்பித்தன

பொருள்கள்

(அங்கிருந்து சொற்களும்

அப்படிப் பார்த்துக்கொண்டிருக்கலாம்

யாருக்குத் தெரியும்

நானோ பொருள்களின்

உலகினன்)


எங்கோ பார்த்ததுபோல்

இருக்கின்றதே

என்று வியப்பு கொண்டன


தன் மகனென்று தெரியாமல்

ஒருவனைப் பார்க்கும்

திரைப்படத் தாய்போல்

அவற்றுக்கு

அடிவயிறு பிசைகிறது


வேண்டாம் வேண்டாம்

உன் பிள்ளைகள் பொல்லாதவர்கள்

காலந்திருப்பிகள்

மீண்டும் சுருங்கிச் சுருங்கி

நுண்மையாகி வந்து

உன்னுள் சூல்கொண்டுவிடுவார்கள்

என்று எச்சரித்தேனோ இல்லையோ

அவையெல்லாம் கேட்டதோ இல்லையோ


சொல்லிழந்த நிலையில்

பொருளெல்லை மறைந்து

ஒரே பொருளாகி

ஒரே பொருளின்

உள்ளே

மகாகருவறை

அதனுள்ளே நான்


அப்போது

அப்போது

இருட்துணையாக

இருளச்சம் போக்க

இருட்குளிர்காய

உச்சரிக்கிறேன்


என்னைப் போலவே இருக்கும்

ஒரு சொல்லை


அது தீ

கொண்டுவருமா

வென்றெண்ணி


பின்

அறிகிறேன்

அது எல்லாவற்றுக்கும் முதல் சொல்

என்று


அறிகிறேன்

இருப்பது

அந்த ஒரே சொல்லென்று


அச்சொல்

என்னை ஒளியாக்

கென்றது


அப்படியே

ஆகுக என்றேன்


ஒளியான சொல்தான்

ஓரிடம் நில்லாதே


கருவறை

வெளிவாசல் விலக்கி

தனக்கென்றொரு விரைவு சூடி

இனி காலமெல்லாம்

அவ்விரைவளக்கும்

கணக்கு தேடி

தலைகொள்ளாமல் தெறித்தோட


அலகிலா திசைகளில்

ஒரு சொல்லின்

தற்படம்

     - ஆசை

Friday, June 16, 2023

நிர்மலா லெட்சுமணனுக்கு வாழ்த்துகள்!

 



நிர்மலா லெட்சுமணன் அவர்கள் The Hindu Group Publishing Private Limited‘ தலைவராக நியமிக்கப்பட்டிருக்கிறார்.  இந்த சமயத்தில் 'இந்து தமிழ்' நாளிதழுடனான அவருடைய உறவையும் அணுகுமுறையையும் கொஞ்சம் இங்கே பகிர்ந்துகொள்ள வேண்டும் என்று நினைக்கிறேன்.

‘தி இந்து’ குழுமத்தின் உரிமையாளர்களில் ஒருவரான அவர் ஆங்கில நாளிதழின் இலக்கிய முகமாகவும் இருப்பவர். ‘தி இந்து லிட் ஃபார் லைஃப்’ என்ற இலக்கியத் திருவிழாவை முன்னெடுத்து நடத்துபவர். இந்தியாவின் முக்கியமான இலக்கியத் திருவிழாக்களுள் ஒன்றாக அது பெயர்பெற்றிருக்கிறது. 

முன்னதாக 'இந்து தமிழ்' நாளிதழின் தலைவராக நிர்மலா லக்ஷ்மண் சில காலம் செயல்பட்டார். 
'தி இந்து' ஆங்கில இலக்கிய விழாவைப் போல தமிழிலும் 'லிட் ஃபெஸ்ட்' நடத்த வேண்டும் என்பது அவருடைய விருப்பமாக இருந்தது. இதற்கான திட்டமிடல், நிகழ்ச்சிப் பொறுப்பு, நெறியாள்கை உள்ளிட்ட பல முக்கியப் பொறுப்புகள் நடுப்பக்க அணியிடம் இருந்தன. ஆசிரியர் அசோகனும், நடுப்பக்க ஆசிரியர் சமஸும் முழுமையாக இந்தப் பணிகளை என்னிடம் ஒப்படைத்தனர். இது தொடர்பான ஆலோசனைக்காக நிர்மலா அவர்களைச் சந்திக்க வேண்டியிருந்தது. 

தமிழ் ஆளுமைகளில் ஐந்து பேருக்கு  சாதனையாளர் விருதும் ஒருவருக்கு வாழ்நாள் சாதனையாளர் விருதும் வழங்கலாம் என்று அப்போது நான் முன்மொழிந்தேன்.  விருதுத் தொகை தொடர்பாக முடிவெடுக்கும் அதிகாரம் விளம்பரத் துறையினரைச் சார்ந்திருந்தது. ஏனென்றால், ஏராளமான பொருள் செலவில் நடக்கும் இந்த விழாவில் விளம்பரதாரர்களின் பங்களிப்பு முக்கியமானது.  ஆங்கில நாளிதழ் அளவுக்கு தமிழ் நாளிதழுக்கு விளம்பரம்  பெறுவது சிரமம். ஆகையால், சமகாலச் சாதனையாளர்களுக்கு நபருக்குத் தலா ரூ.25 ஆயிரமும், வாழ்நாள் சாதனையாளருக்கு ரூ. 1 லட்சமும் வழங்கலாம் என்று விளம்பரத் துறையினர் கூறியிருந்தார்கள். எனக்கோ ஆங்கில எழுத்தாளர்களுக்குக் கொடுக்கப்படுவது போன்ற ஒரு கணிசமான விருதுத் தொகை தமிழ்ப் படைப்பாளிகளுக்குக் கிடைத்தால்தானே உரிய மரியாதையாக இருக்கும் என்ற எண்ணம் அழுத்திக்கொண்டே இருந்தது. விளம்பரத் துறையினருடனான கூட்டத்தில் ஆசிரியர் குழு நடத்திய பேச்சில் வெற்றி கிடைக்கவில்லை. இப்போது நிர்மலா அவர்களுடன் பேசும்போது இதை ஒரு வலியுறுத்திப் பார்ப்போம் என்று எண்ணினேன். 

விளம்பரத் துறையினரின் முடிவு, தமிழ் - ஆங்கில எழுத்தாளர்கள் இடையே பாகுபாட்டை வெளிப்படுத்துவதாக அமைந்துவிடும் என்று நிர்மலா அவர்களிடம் குறிப்பிட்டேன். ஏனென்றால் 'தி இந்து' ஆங்கிலம் நடத்தும் லிட்ஃபெஸ்ட் இலக்கிய விழாவில் போட்டியில் வென்ற எழுத்தாளர்களுக்கு வழங்கப்படும் விருதுத் தொகை ரூ. 5 லட்சமாக இருந்தது. நிர்மலா அவர்களிடம் இதைத் தெரிவித்தேன். 
  
உடனே துளி தயக்கமும் இல்லாமல் அவர் சொன்னார், ‘எஸ் எஸ் யு ஆர் கரெக்ட். பார்ஷியாலிட்டி காட்டக் கூடாது. ஆசைத்தம்பி சொல்றதுபோலவே லைஃப் டைம் அச்சீவ்மென்ட்டுக்கு ஃபைவ் லேக் ருப்பீஸும் மற்ற எழுத்தாளர்களுக்கு ஒவ்வொருத்தங்களுக்கும் ஒன் லேக் ருப்பீஸும் கொடுத்திடுவோம்! அதனால் என்ன தொகை குறைவாகுதோ அதை மேனேஜ்மென்ட் கொடுக்கும்’ என்றார். அந்த நிமிடம் என்னால் ஒருபோதும் மறக்க முடியாது. 

விளைவாக, தமிழில் அதுவரை இல்லாத வகையில், முதல் ஆண்டு இலக்கியத் திருவிழாவில் வாழ்நாள் சாதனையாளர் விருதுக்கு ரூ. 5 லட்சமும், சமகாலச் சாதனையாளர்களுக்கு ரூ.ஒரு லட்சமும் வழங்கப்பட்டது.  பிந்தைய ஆண்டுகளில் இந்தத் தொகை குறைந்தது தனிக் கதை.
 நான் நிகழ்ச்சிப் பொறுப்பேற்றிருந்த இரண்டு விழாக்களில் மட்டும் மொத்தம் ரூ. 15 லட்சம் தமிழ் எழுத்தாளர்களுக்கு விருதுத் தொகையாக வழங்கப்பட்டிருந்தது.

இந்திரா பார்த்தசாரதி, கோவை ஞானி, விக்கிரமாதித்யன், இமையம், பா.வெங்கடேசன், சீனிவாச ராமாநுஜம், தமயந்தி, கீரனூர் ஜாகீர்ராஜா, சயந்தன் ஆகியோர்தான் அந்த விருதாளர்கள். 

. “ஜெய்பூர் லிட்ஃபெஸ்ட் மாதிரியான சர்வதேச நிகழ்வுகளில் கலந்துக்குற எழுத்தாளர்களைத்தான் சொகுசான உயர்தர ஹோட்டல்ல தங்க வச்சு கௌரவப்படுத்துவாங்க. அதுமாதிரியான கௌரவம் தமிழ் எழுத்தாளர்களுக்குத் தமிழ்நாட்டுலேயே கிடைக்கணும்னு நெனைச்சிருக்கேன். தாஜ் கொரமண்டல் ஹோட்டல்ல தங்கவைச்சு அந்தக் குறைய ‘இந்து தமிழ்’ போக்கிடுச்சி. அப்பப்பா அற்புதமான கவனிப்பு” என்று மொழிபெயர்ப்பாளர் ஜி.குப்புசாமி என்னிடம் கூறியபோது ஏற்பட்ட மகிழ்ச்சிக்கு அளவே கிடையாது. 

எழுத்தாளர்களையும் உரையாளர்களையும் மிகுந்த அக்கறையுடன் கவனித்துக்கொள்ள வேண்டும் என்று நிர்மலா மேடம் திரும்பத் திரும்பக் கேட்டுக்கொண்டார். உரையாளர்களுக்கு மதிப்புத் தொகையுடன் சிறந்த புத்தகங்களும் தர வேண்டும் என்ற முடிவு எடுக்கப்பட்டு அப்படியே வழங்கப்பட்டது. பிறகு கோவையில் நடைபெற்ற லிட்ஃபெஸ்ட்டில் பரிசுத் தொகுப்பில் என் தனிப்பட்ட தேர்வாக ஃப்ரண்ட்லைன் - தி இந்து வெளியீடான ‘The Art of India' (இரண்டு தொகுதிகள் ) நூலை நான் தயக்கத்துடன் முன்வைத்தேன். ஏனெனில் அதன் விலை ரூ. 5,000. ஆனால், என்னுடைய பரிந்துரை உடனே ஏற்றுக்கொள்ளப்பட்டது. அந்தப் புத்தகம் உள்ளிட்ட பல புத்தகங்கள் பரிசுத் தொகுப்பில் இடம்பெற்றன. 


நிர்மலா லெட்சுமணன் அவர்களும் க்ரியா ராமகிருஷ்ணனும் நண்பர்கள். முதல் லிட்ஃபெஸ்ட் நடந்து முடிந்தபோது நிர்மலா மேடத்திடம் ராமகிருஷ்ணன் முறையிட்டார், ‘இப்படிப் பண்ணிட்டீங்களே?’ அதற்குப் பதறிப் போய் நிர்மலா மேடம் கேட்டார், ‘அய்யோ என்னாச்சு?’ அதற்கு ராமகிருஷ்ணன் ‘இப்படி ஆசைத்தம்பியை என்கிட்ட இருந்து பறிச்சிக்கிட்டீங்களே’ என்றார். அதற்கு சிரித்துக்கொண்டே ‘உங்ககிட்ட இருந்து இப்படி ஒருத்தர் கிடைச்சா எப்படி மிஸ் பண்ணுவோம்’ என்றார் நிர்மலா மேடம். திறமையைச் சரியாக அங்கீகரிக்கத் தெரிந்தவர் அவர். 

நிர்மலா லெட்சுமணன் அவர்களுக்கு என் மனமார்ந்த வாழ்த்துகள்!

குயில் செருகிய வாள்



முதலில்

மெதுவாகத்தான் ஆரம்பித்தது


நான் இருக்கிறேன்

என்பதைத் தானே

அறிந்துகொள்ள

ஒரு 'கூ'வை

எடுத்து

விட்டது குயில்


தான் இருப்பது

தனக்கே உறுதிப்பட்ட

பரவசம் தந்த

சிறுதிமிரில்

நான் இருக்கிறேன்

என்று

எல்லோருக்கும்

எல்லாவற்றுக்கும்

தெரியப்படுத்த ஆசைப்பட்டு

இன்னொரு 'கூ'வை 

எடுத்து

விட்டது


ஏதும் நிகழவில்லை


மறுபடியும் மறுபடியும்

கூ கூ கூ

ஒன்றும் ஒருவரும் அசைந்துகொடுக்கவில்லை


தான் இருக்கிறேன்

என்பதைச் சொல்ல

ஒரு குயில்

எவ்வளவு

கழுத்தறுத்துக்கொள்ள

வேண்டியிருக்கிறது


விரக்தியிலும்

கோபத்திலும்

அடுத்து எடுத்தது

ஒரு பென்னம்பெரிய வாளை


அதை ஒரு

கூவில் தோய்த்துக்

கண்சிமிட்டும் நேரத்தில்

சொருகியது

சூழலுக்குள்

சோம்பல் முறித்துக்கொண்டிருந்த

அனைத்திலும்


அப்போதும்

ஏதும் நிகழ்ந்ததாய்த்

தெரியவில்லை


ஆனால்

வானம்தான்

எவ்வளவு நேரம்

வலிக்காதது போலவே

நடித்துக்கொண்டிருப்பது


கூர்முனை எழுப்பிய

வலியை

புதிதாய்க்

கனன்றுகொண்டு வந்த

காயம்

காட்டிக் கொடுத்தது


அந்தக் காயத்தின்

தகிப்பில்

இந்நாளின் குடைக்குள்

குறுக்குமறுக்காய்

நாம் ஓடிக்கொண்டிருக்க

வேண்டும்


இந்தக்

குயில் நடத்தும் கூத்து

கோடை முழுக்கத் தொடருமே


அதை யார்

கோடையின்

காவல் தெய்வமாய் ஆக்கியது

எடுத்ததற்கெல்லாம்

கொடை கேட்கிறதே

         - ஆசை


Thursday, June 15, 2023

ஜேசிபிகளின் எதிர்க் கடவுள்


ஆயிரம் ரூபாய் கொடுத்து

வாங்கிய ஜேசிபி

அன்று மாலையே

அக்குவேறு ஆணிவேறாகக்

கிடக்கிறது


எது ஜேசிபியை

ஜேசிபி ஆக்குகிறது

என்று வாங்கிய உடனே தோன்றிய 

ஆன்மீகக் கேள்வியின்

விளைவு அது


அல்லது

ஈவிரக்கமற்ற நபரொருவர் கையில்

அகப்படும்போது

ஜேசிபிகளின் மனதில் 

என்னென்ன உணர்வுகள் எழும்

என்பதைக் கண்டறிவதற்கான

உளவியல் ஆராய்ச்சி அது


அல்லது 

ஜேசிபிகளின் பின்னுள்ள

நோக்கத்தை உருவி

அங்கே எதிர்நோக்கம் ஒன்றை

உருவாக்கும் முயற்சி அது


கிரேன்கள்

கார்கள்

ஹெலிகாப்டர்கள்

கரடிகள்

புலிகள்

எல்லாவற்றுக்கும்

இதே கதிதான்


ஜேசிபியின் பாகங்கள் 

வீட்டின் வெவ்வேறு திசைகளின்

ரகசியங்களை அறிந்துகொள்ள

அனுப்பப்படும்போது

அதன் கண்டுபிடிப்பாளர்  கல்லறைக்குள்

நீர் நிரம்புகிறது


அது தோண்டிய பள்ளங்கள்

மலைகளாகின்றன


இப்படித்தான்

கிரேன்களின் விதியால்

கட்டிடங்கள் சரிந்து

அதே இடத்தில்

முந்தைய உயரத்தை ஈடுசெய்யும்

ஆழங்கொண்ட

கிணறுகள் தோன்றுகின்றன


புலிகளின் வயிறு குதறப்படும்போது

உள்ளிருந்து தப்பியோடுகின்றன

மான்களும் ஆடுகளும் மாடுகளும்


பெரியபெரியனவற்றின் கடவுள்

அவற்றைப் படைக்கும்போது

அவற்றின் ஆணவத்தையும்

மூர்க்கத்தையும் கண்டஞ்சினார்


பின் எல்லாவற்றுக்கும்

பொம்மை செய்தார்


பின் பெரியபெரியனவற்றின்

ஆணவத்தையும் மூர்க்கத்தையும்

பரிகசிக்கும் தேவதூதனைச் செய்தார்


தேவதூதன்

முதல் வேலையாகக் கடவுளை

அக்குவேறு ஆணிவேறாகக்

கழற்றிப்போட்டுவிட்டு

அவருக்கு எதிர்ப்பொருள் செய்தான்


அதன் பின்தான்

ஆயிரம் ரூபாய்

ஜேசிபி மீது

கை வைத்தான்

    - ஆசை

    23-04-23