சிசிடிவி பெண்

தன் தோழியின்

உடைமாற்றும் வீடியோ

பார்த்த அன்றுதான்
நோய்த் தொற்று ஏற்பட்டது

என்று சொல்லலாம்

வீட்டை விட்டு வெளியே வந்தாலே
எங்கும் துழாவ ஆரம்பிக்கும்

அவள் கண்கள்

மால்களில் திரையரங்குகளில்

கல்லூரி வகுப்பறையில்

திருமண நிகழ்ச்சிகளில்

கடற்கரைகளில்

ரயில் நிலையங்களில்

எல்லா சிசிடிவிகளும்

கைபேசிகளும்

தன்னை ஊடுருவிக்கொண்டிருப்பதை

அவள் எப்படியும் கண்டுபிடித்துவிடுவாள்

சாத்தியமில்லை என்று நினைக்கும்

இடங்களிலும்

சிசிடிவியைக் கண்டுபிடிக்கும்

மோப்ப நாயை

அவள் எப்போதும் தன்னுடன்

வைத்துக்கொண்டிருப்பாள்

போகுமிடமெல்லாம் சண்டையிட்டாள்

எதிர் இருப்பவர் கைபேசிகளைப்

பிடுங்கி உடைத்தாள்

புகைப்படக்காரர்களின் கேமராக்களைப்

பறித்துக்கொண்டு

சிப்புகளை உருவிக்

காலில் போட்டு மிதித்தாள்

வீட்டுக்குள்ளும்

மூலை முடுக்குகளெல்லாம்

தேடிப்பார்க்க ஆரம்பித்தாள்

குளியலறைக்கும்

கழிப்பறை செல்வதற்கும் தயங்கினாள்

அவளுக்கு நோய் முற்றிவிட்டது

இப்போது

மின்சார ரயிலில்

கம்பியைப் பிடித்துக்கொண்டு நிற்கும்

உங்களை உற்றுப்பார்த்தபடி

முன்னேறி வருகிறாள்

இலவசமாகக் கிடைத்த பார்வையை

நீங்களும் வீணாக்காமல்

உருட்டிப் பார்த்துக்கொண்டிருக்கிறீர்கள்

அவள் உங்கள் கண்களுக்குள்

சிசிடிவியைக் கண்டுபிடித்துவிட்டாள் என்பதையும்

இன்னும் ஓரிரு நொடிகளில்

உங்கள் மூக்கு உடைந்து சிதறப்போகிறது

என்பதையும்

பாவம் நீங்கள் அறிய மாட்டீர்கள் 

    09-02-2017