விமானங்களிலிருந்து விழாத கானாங்கோழிகள்

Photo: Jerry Ting

காலிமனையில்

முட்செடிகளின் சிறுவனம்

அதன் விதானத்தில்

எப்போதும் இரண்டு கானாங்கோழிகள்

குழந்தைக்குச் சோறூட்ட

வேடிக்கை

நேற்று அழிக்கப்பட்டது

அவ்வனம்

இன்று அருகிலுள்ள வீட்டின்

வாசலைக் கடந்து

நடந்து சென்றன

அந்தக் கானாங்கோழிகள்

வேறெங்கோ ஒரு சிறுவனம்

விடுத்த அழைப்பின் பாதையில்

அழைத்திருக்கும் என்ற

நம்பிக்கையின் பாதையில்

பதறுவதற்கு ஒன்றுமில்லை

தப்பியோடும்

கானாங்கோழிகள்

விமானங்களில் தொற்றிக்கொள்வதில்லை

விமானங்களிலிருந்து கொத்துக்கொத்தாக

விழுந்து மடிவதில்லை

ஏனெனில்

நடப்பதையே பெரிதும் விரும்பினாலும்

அவற்றுக்குப்

பறக்கவும் தெரியும்

பறக்கத் தெரியாத

கானாங்கோழிகளும் இருக்கின்றன

அவை ஏன்

தரையை விடுத்து

வானைத் தேர்ந்தெடுக்கின்றன

என்பதில் வாழ்தலின்

எந்த சூட்சமம்

அடங்கியிருக்கிறது

ஈர்ப்பு விசையின்

அவலம்தானா

வாழ்க்கை

எங்கிருந்தோ நம்பிக்கையின் வாசனையைக்

காற்றில் மிதக்கவிடும்

அந்தச் சிறுவனம்

தன் பாதையை

வானத்தில் வைத்தது ஏன்

என்ற கேள்வி

நிச்சயமின்மையிலிருந்து

நிச்சயமின்மை நோக்கிப்

போகும் விமானமாகப்

பறந்துகொண்டிருக்கிறது