குற்றவுணர்ச்சியின் ஆணுறை

வெட்கமாக இருக்கிறது
ஆயினும் இன்பமாகத்தான் இருக்கிறது

கடந்து செல்லும் பெண்ணைத்
தடவச் சொல்லி
வருடச் சொல்லித்
தூண்டுகிறது குற்றம்

தடவ வேண்டாம்
வருட வேண்டாம்
கடக்கையில்
தானாய் வருடல்
நிகழும் வண்ணம்
நின்றுகொள் என்கிறது
குற்றவுணர்ச்சி

பார்க்கச் சொல்லித்
துழாவச் சொல்லித்
தள்ளுகிறது
குற்றம்

தலைத்திசை
கண்திசை வேறு பக்கம் செலுத்திக்
குறித்திசை பொருத்தென்கிறது
குற்றவுணர்ச்சி

உறுப்பெடுத்து
உரசச் சொல்லி
அரியாய் அரிக்கிறது
குற்றம்

கடப்பவளின் கண்ணியமல்ல
உறுப்புடையான் கண்ணியம் காத்து
உறுப்படக்கிச் செருப்படி தவிர்க்கச் சொல்லும்
குற்றவுணர்ச்சி

குற்றம் யோனிசூட்ட
குற்றவுணர்ச்சி ஆணுறைசூட்ட
வெட்கமாக இருக்கிறது
ஆயினும் இன்பமாகத்தான் இருக்கிறது