Monday, January 2, 2017

வரலாற்றை மதிப்பு நீக்கம் செய்த ஒன்றுக்கு




வரலாற்றுச் சிறப்பு மிக்க
உரையைக் கேட்டுமுடித்ததும்
முட்டிக்கொண்டு வந்ததே பார் ஒன்றுக்கு

வரலாற்றுச் சிறப்பு மிக்க சுவர்
ஒன்று அருகில் இருந்தது
‘தூய்மை இந்தியா’ பிரகடனத்துடன்

வரலாற்றுச் சிறப்பில்லாத என்
ஒன்றுக்கை அந்தச் சுவரின் மீது அடிக்க ஆரம்பித்தேன்

வரலாற்றுச் சிறப்பு மிக்க உரைகளை ஆற்றும்போது
வரலாற்றுச் சிறப்பு மிக்க மனிதர்களுக்கு
ஒன்றுக்கு முட்டுமா?
இல்லை
வரலாற்றுச் சிறப்பு மிக்க உரையே
வாயால் அடித்துவிடப்படும்
வரலாற்றுச் சிறப்பு மிக்க ஒன்றுக்குதானா?

வரலாற்றுச் சிறப்பு மிக்க ஒன்றுக்கால்
எதையும் மதிப்பு நீக்கம் செய்ய முடியும்போல
என்று நினைத்துக்கொண்டபோது
ஒன்றுக்கால் வரலாறு எழுதி
அதையே மதிப்பு நீக்கம் செய்ய வேண்டும்
என்ற வெறி எழுந்தது என்னுள்

வாகாகச் சுவரில்
எழுதத் தொடங்கினேன்
‘வ… ர… லா…’

நின்றுவிட்டது ஒன்றுக்கு

‘று’வுக்குக் கூட காத்திராத ஒன்றுக்கு
என்ன ஒன்றுக்கு?

1 comment:

  1. அதற்குமேல் உங்களால் ஒன்றும் செய்யமுடியாதல்லவா?

    ReplyDelete